كارثة في مستشفى بالدقي.. مدرس يفقد بصره بعد عملية مياه بيضاء

في واقعة مؤسفة جديدة تعيد إلى الأذهان ملف الإهمال الطبي الذي يعاني منه المرضى في بعض المستشفيات، كشف شخص عن فقدان والده لبصره بشكل كامل، بعد أن خضع لعملية جراحية بسيطة لإزالة مياه بيضاء في أحد المستشفيات الشهيرة بالجيزة، ليتحول الأمر إلى كارثة انتهت بتفريغ كامل للعين.

القصة التي رواها نجل المريض، عبدالرحمن محمد حسين عبدالعزيز، لـ"تليجراف مصر"، لم تكن حالة فردية، بل امتدت لتشمل أكثر من 21 مريضًا بنفس المستشفى، واجهوا المصير ذاته، بحسب روايته.

تفاصيل الواقعة

يقول عبدالرحمن، وهو يروي تفاصيل ما جرى لوالده مدرس اللغة العربية بمدرسة جمال عبدالناصر: “والدي عينيه راحت وحصل لها تفريغ كامل بسبب الإهمال الطبي الشديد في مستشفى شهير بالدقي”.

وتابع: “يا ريت الموضوع اقتصر على والدي لوحده، ده معاه 21 حالة غيره، وكلهم عينهم راحت، وفي منهم اللي اتلحق، والله أعلم إذا كان اتلحق الباقي ولا لأ”.

بداية الواقعة

ويقول عبدالرحمن: “الحكاية إن بابا كان عنده مياه بيضاء في عينه اليمنى، وكان لازم يعمل العملية ويزرع عدسة، يوم الإثنين 1-9-2025 عمل العملية، والدكتورة اللي عملتله العملية اسمها (سحر.ع)، وهي سبب من أسباب فقدان أبويا عينه عشان الإهمال والأجهزة غير المعقمة، وكلها بكتيريا وأمراض”.

نزول صديد مع بكتيريا والتهابات شديدة

وواصل حديثه: “أول ما روحنا البيت بعد العملية على طول، والدي كان بيتألم جامد، وجع رهيب وما كانش قادر من التعب، وده ما كانش طبيعي، عينه نزلت صديد بشكل كبير وشكلها كان غريب”.

وأضاف عبدالرحمن: “روحنا المستشفى تاني يوم 2-9، والدكتور قاله لازم تعمل لي سونار، لأنك تقريبًا عندك تلوث، عملنا السونار وطلع فعلًا عنده بكتيريا والتهابات شديدة في العين بسبب أدوات المستشفى”.

حقن جديد للعين وتلوث هوائي

وتابع نجل المريض: “رجعنا المستشفى بعد السونار، دكتورة صغيرة شافت النتيجة وكلمت الدكتور في الموبايل قالتله يمشي ولا ابعتهولكوا، كأن الموضوع بسيط، أختي فهمت إن الموضوع كبير وعايزين يشيلوا إيديهم، فقررت أنها مش هتمشي غير لما بابا يتعالج، ودخلوا الطوارئ وعملوا له حقن في عينه، وده معناه إن في نزيف، ومحدش قالنا”.

وأكمل: “بعدها كتبوا في الورق اللي بنمضي عليه فجأة إن في (تلوث هوائي)، وده عشان يأمنوا نفسهم، وبعدها خرج والدي من العمليات واتحجز عندهم، ويوم 3-9 الطبيب (حافظ.م) قال لنا نصًا (الحالة كويسة ومش محتاجة حاجة تاني)".

اختفاء أطباء المريض

وأوضح عبدالرحمن: "بس الحقيقة إن عين والدي كانت بتتآكل من البكتيريا، والدكاترة اختفوا، لا حافظ ظهر ولا سحر كمان ظهرت، وكأنهم عارفين إن في كارثة حصلت، وكانوا بيضللونا ويقولوا إن فيه تحسن لحد يوم 6-9 لما قالوا لأول مرة إن الحل الوحيد تفريغ العين بالكامل عشان الفيروس ميوصلش للمخ والعين التانية".

تقرير بأسباب مختلفة

وتابع عبدالرحمن: “فضلنا نطالب بتقرير رسمي بحالة والدي، وكل مرة يماطلوا، وفي الآخر كتبوا تقرير إن البكتيريا جات من بره مش من المستشفى، وقالوا عملنا تحاليل على المراوح والتكييفات والأجهزة وكلها سليمة، وكأن المشكلة من المريض نفسه مش من عندهم”.

حالات أخرى بالقسم

وأضاف عبدالرحمن: “في الوقت ده كنا مش لوحدنا، الدور كامل في قسم الرمد كان مليان مرضى بنفس المشكلة، حصلت خناقات وزعيق، والأمن كله طلع القسم عشان يسكتونا، كلمنا النجدة، وجاء ظابط من قسم الدقي، وعملوا اجتماع مع رئيس الأطباء (محمد.ا)، والمحاسب، لكن برضوا كان في تعتيم غير طبيعي على الدكتورة سحر والدكتور حافظ”.

مشاكل على التقرير

وتابع عبدالرحمن: "حاولوا يمشونا من غير تقرير، لكن فضلنا لحد الساعة 6 المغرب مستنيين، وفي الآخر لما صممنا وقطعنا التقرير الأول اللي كتبوه غلط، عملوا تقرير تاني، بس برضوا حاولوا يطلّعوا أبويا من غير ما نشوف التقرير، لكن مع الإصرار شوفناه".

عملية تفريغ للعين.. ومحضر رسمي

وقال عبدالرحمن: “يوم السبت اللي فات اتعمل لوالدي عملية تفريغ للعين بالكامل في القصر العيني، ومستنيين تقرير رسمي من هناك يوضح الحقيقة كاملة، وإن شاء الله النيابة تحقق والحق يبان”.

وواصل: “إحنا عملنا محضر رسمي ضد المستشفى، والمحامي راح النيابة الإدارية وبلغهم، وقالوا له إن عندهم بلاغات كتير ضد المستشفى دي”.

مطالبة بالمحاسبة

واختتم عبدالرحمن: “أنا مش معترض على قضاء ربنا، والحمد لله راضي بكل حاجة، بس إزاي يسيبوا الناس كده؟! إزاي محدش يقولنا إن عين والدي بتروح؟ إزاي يضللونا ويغيبوا الحقائق؟! أنا عايز حق والدي يتجاب، ويتحاسب كل مسؤول من أول مدير المستشفى لحد أصغر ممرض”.