"ما خدتش أي فلوس".. مفاجأة في أقوال "موكا" مؤدي امتحانات رمضان صبحي

حصلت "تليجراف مصر" على نص أقوال الطالب “يوسف.م” الشهير بـ"موكا" الذي أدى امتحان معهد الفراعنة العالي للسياحة باسم لاعب بيراميدز رمضان صبحي، في قضية التزوير المعروفة إعلاميًا باسم “تزوير معهد السياحة”.

س: ما هو مؤهلك الدراسي تحديدًا؟

ج: أنا حاصل على بكالوريوس نظم ومعلومات .

س: وماهى جهة حصولك على ذلك المؤهل الدراسي؟

ج: أنا حصلت على بكالوريوس نظم ومعلومات من معهد القاهرة العالي للغات والترجمة ويقع في المقطم شارع الأكاديمية.

س: ما هي ظروف ضبطك وإحضارك وعرضك علينا؟

ج: اللي حصل إني عارف واحدة اسمها منة ومتصاحب عليها من يومين وإمبارح كان عندها امتحان في معهد الفراعنة للسياحة ورحت وصلتها لجوا المعهد لحد باب اللجنة وبعدين وأنا خارج لقيت أستاذ عصام من المعهد وقفني وقال لي "هات الكارنيه بتاعك" ولما قلت له مش معايا راح مسكنى من التي شيرت وقال لي "إنت دخلت المعهد إزاي" وضربني على وشي. 
 

س وما سبب ومناسبة تواجدك بالزمان والمكان سالفي الذكر؟

ج: أنا كنت رايح أوصل واحدة صاحبتي المعهد وأداني صاحب كافيه الكارنيه وطلعت امتحن.

س: هل الكارنيه المعروض عليك صورته بمحتوى تطبيق واتس آب الخاص بك والتي على هاتفك المحمول والتي من ضمن محتوى المحادثة فيما بينك وبين المدعو طارق المصرى VIP خاصة بك؟

ج: أيوة.

س وما هي كيفية وطريقة تحصلك على ذلك الكارنيه سالف البيان؟

ج: أنا استلمت الكارنيه ده من المعهد عن طريق طارق المصرى وهو اللى استلمه من المعهد وإداه لي وقال لي امتحن مكان رمضان صبحي وأنا معرفوش.

س وما هي بيانات المدعو طارق المصرى تحديدًا؟

ج: أنا معرفش عنه غير اسمه طارق المصري.

س وما العلاقة التي تجمعكما تحديدًا؟

ج هو كان فاتح كافيه في المقطم وأنا كنت شغال معاه بس العلاقة بينا اتقطعت لأنه قفل الكافيه اللي أنا كنت شغال فيه عنده من حوالي سنتين أو ثلاثة.

س وما علاقتك بالمدعو رمضان صبحي؟

ج: أنا معرفوش ومفيش بينا أي علاقة.

س: وما طبيعة الاتفاق فيما بينك وبين المدعو طارق المصرى ؟

ج: أنا متفقتش معاه في أي حاجة هو قال لي هتدخل الامتحان بدل حد وإداني الكارنيه.

س وهل تحصلت على ثمة مقابل لتلك الأعمال؟

ج لا أنا ما خدتش أي فلوس.

س وما قولك فيما ثبت بمطالعة هاتفك المحمول بوجود تحويلات لمبالغ مالية فيما بينك وبين المدعو طارق المصري؟

ج دى فلوس كانت ليا عنده وهو حولها لي.

س وما علاقتك بالمدعو محمد إبراهيم عبد الواحد الشهير "بالعمدة"؟

ج: أنا مفيش بينى وبينه أي علاقة غير إن طارق قال لي ابقى اروح له علشان أخد منه استمارة بطاقة.

س هل لديك اسم شهرة؟

ج: شهرتى في الشغل "موكا".