"عايز خدامة ورماني عشان مرضي"، مأساة سيدة بعد إصابتها بمرض السرطان

اكتشفت سيدة إصابتها بمرض السرطان، وجرت الأمور معها على عكس المتوقع، فما لاقت من زوجها أو أهلها إلى الابتعاد عنها وتركها وحيدة تصارع أزمتها، مأساة عاشتها السيدة فاطمة شعبان في مدينة 6 أكتوبر.

كنت عارفه اني محدش هيقف معايا غير ربنا 

وانتقل محرر "تليجراف مصر" إلى منزل السيدة فاطمة لمعرفة تفاصيل قصتها، وافتتحت حديثها قائلة: “أنا كنت تعبانة وروحت أكشف والدكتور قالي عندك سرطان، ساعتها دموعي نزلت لأن أنا عارفة إن محدش هيقف معايا غير ربنا”.

جوزي قالي انتي كده كده ميته 

وأضافت فاطمة: “جوزى لما عرف إني عندي سرطان قالي أنتى كده كده ميتة، وكلم أبويا وقاله بنتك طريقها غير طريقي، لأن هو مش عايز واحدة مريضة هو عايز واحدة خدامة في البيت، غير أن هو بيشرب لدرجة إن أخته الكبيرة قاطعته بسببي قالتله فاطمة دي أصيلة وكانت وافقة في ضهرك، ليه أول ما جالها المرض رميتها”.

جالي كهرباء على المخ من كتر الزعل 

وأكملت السيدة: “عيالي متمسكين بيا، بس غصب عنهم عشان عارفين أن أهلي مش هيصرفوا عليا، وأخويا أول واحد قالي أنا مش هربي عيال حد، وأنا غصب عني من كتر الزعل جالي كهرباء على المخ، وبيجيلي تشنجات بروح في غيبوبة وأفوق وما أكونش عارفة حد”.

هسيبك لغاية لما تتنازلي عن كل حاجة وهطلقك 

 وأضافت فاطمة: “بنتى بتقول لأبوها أنا أمي تعبانة ومحتجاني جنبها وتعبها ده بسبب أن إحنا بعاد عنها، وهو قالي هسيبك كده لحد ما تتنازلي عن كل حاجة وبعدها هطلقك الطلقة التالتة، حتى العيال مش عايزني أخدهم ولا أشوفهم، وقولتله أنا مقدرش أستغنى عن العيال، أنا الكهربا بتعلى عندي من الزعل عشان عيالي بعيد عني أنا علاجي هو عيالي”.

رسالة الأم لأطفالها 

واختتمت فاطمة حديثها لـ"تليجراف مصر" قائلة: “رسالة كنت كاتباها لأولادي، (يارب اجبر بخاطري زي ما أنا بجبر بخاطر الناس، وارزق كل محتاج وفك كرب كل مكروب واشفي كل مريض، يا رب أنت الشافي المعافي اشف كل مريض واستر وبارك في كل البنات واجبر بخاطر بنتي نور وابني الجميل عبدالرحمن ويس وباركلي فيهم، يا الله إني استودعتهم عندك يا رب باركلي فيهم واحفظهم بحفظك الكريم)”.

اقرأ أيضًا: 

سيدة تكتشف إصابتها بسرطان الرئة وتشفى منه في نفس اليوم

بابتسامة وباقة ورد، أطفال مستشفى 57357 يستقبلون النائب العام