محمد نشأت: "شبيك لبيك" مغامرة إذاعية.. والراديو لسه بيخلق نجوم من غير كاميرا

وسط زحام المنصات الرقمية، يظل الراديو محتفظًا بسحره الخاص، حيث الصورة تُخلق بالصوت، والخيال هو البطل الحقيقي، من هنا جاءت تجربة فوازير "شبيك لبيك" على الراديو 9090، في شكل دراما إذاعية تمزج بين الكوميديا والغناء والفانتازيا.

العمل بطولة المذيع محمد نشأت، والفنانة راندا البحيري، ومن تأليف محمد المعتصم، وتدور أحداثه حول مذيعين يبحثان عن فرصة حقيقية في الراديو، قبل أن يظهر لهما عفريت يقلب حياتهما رأسًا على عقب ويحوّلهما إلى مطرب ومطربة، لتبدأ المسابقة الحقيقية مع الجمهور: من هو المطرب؟ ومن هي المطربة؟

في هذا الحوار، يتحدث محمد نشأت عن كواليس التجربة، وعن راندا البحيري، وعن علاقته القديمة بالراديو وجيل "قهوة سادة".

بداية.. ما الذي حمسك لتجربة "شبيك لبيك"؟

الفكرة نفسها شدتني جدًا، إنك تقدم فوازير لكن في شكل دراما إذاعية فيها قصة وشخصيات وصراع، ده شيء مش تقليدي، إحنا مش بنقدم مجرد سؤال وإجابة، إحنا بنحكي حكاية فيها حلم وطموح وكوميديا وفانتازيا.

العمل يتناول قصة مذيعين يبحثان عن فرصة.. هل شعرت أن الموضوع قريب منك شخصيًا؟

طبعًا، أي حد اشتغل في الراديو عارف إحساس إنك مستني فرصة تثبت نفسك، فكرة إن فيه مسابقة غنائية لاكتشاف المواهب، وفجأة يظهر عفريت يغيّر مصير الشخصيتين، دي رمزية جميلة جدًا عن الحلم السريع مقابل السعي الحقيقي.

كيف تعاملت مع فكرة التحول إلى "مطرب" داخل الأحداث؟

كان تحديا لطيفا جدًا، لازم أقدم الشخصية بشكل مختلف شوية، وبإحساس مطرب فعلًا، لكن من غير ما أفقد روح المذيع اللي جواه، وده جمال الدراما الإذاعية، كل التحولات بتحصل بالصوت بس، لكي يتمكن المستمع من معرفة المطرب أو المطربة بطل الحلقة، باختصار أنت بتقدم دراما مشوقة وتصاعد أحداث وفي نفس الوقت كل يوم عندك شخصية مطرب أو مطربة مطلوب من الجمهور التعرف عليها.

الجمهور هو من يحدد من المطرب ومن المطربة.. هل ده عنصر تشويق مقصود؟

أكيد، إحنا عايزين المستمع يبقى شريك في اللعبة، الفوازير قائمة على التفاعل، ولما الجمهور يحس إنه جزء من القصة، ده بيخلق ارتباط أكبر بالعمل، والحمد لله ردود الفعل حلوة جدا وهنا أحب أشكر بيتي الراديو 9090، واشكر الشركة المتحدة البيت الكبير اللي عاملين برامج ودراما رمضانية مميزة هذا العام.

تشاركك البطولة الفنانة راندا البحيري.. كيف وجدت التعاون معها؟

راندا البحيري ممثلة ذكية جدًا، وعندها طاقة كبيرة سواء أمام الكاميرا أو أمام الميكروفون، يمكن ناس كتير تعرفها من الشاشة، لكن في الراديو اكتشفت جانب تاني عندها، خصوصًا في الأداء الصوتي والتلوين في المشاعر، وجودها أضاف للعمل حضور وقوة، وفيه تناغم حصل بينا بشكل طبيعي جدًا.

ماذا عن المؤلف محمد المعتصم؟

محمد المعتصم عنده خيال واسع جدًا، وفكرة العفريت اللي يقلب الأحداث كانت مكتوبة بخفة دم وذكاء، النص فيه نوستالجيا لفوازير زمان، لكن بروح عصرية تناسب جمهور دلوقتي، وده مش سهل.

في رأيك.. لماذا لا يزال الراديو قادرًا على المنافسة؟

الراديو وسيلة صادقة جدًا مفيش صورة تستخبى وراها، ومفيش مؤثرات تبهر من غير مضمون، المستمع بيصدق الصوت وده سر استمراره طول ما فيه حكاية حلوة وصوت صادق، الراديو هيعيش.

ماذا يمثل لك الراديو شخصيًا؟

الراديو مش شغلانة هو بيت أنا بدأت فيه وكبرت معاه، واتعلمت منه كتير جدًا عن التواصل مع الناس، الإحساس إنك بتدخل بيوت الناس كل يوم بصوتك بس ده مسؤولية كبيرة.

"قهوة سادة" محطة مهمة في مشوارك.. ما أقرب ذكرياتك معه؟

"قهوة سادة" تجربة قريبة جدًا لقلبي، أكتر حاجة بحبها فيه إنها صادقة..  تجربة كانت المادة الخام اللي طلعت نجوم السينما والمسرح والدراما، وأنا هنا لازم أجدد الشكر لأستاذ خالد جلال اللي قدم للفن أجيالا من المواهب هتفضل مدينة له بالفضل.

لو عاد بك الزمن لأول يوم في الراديو.. هل كنت ستختار الطريق نفسه؟

من غير تردد ومن حسن حظي إني اشتغلت في مؤسسة بحجم الراديو 9090، مؤسسة مهمة وكبيرة وعظيمة بتنتمي لكيان كبير هو المتحدة، باختصار إنت في الراديو 9090 وسط مجموعة مواهب من أفضل الموجودين على الساحة وهو ما يجعلنا نقدم كل ما في وسعنا لنستمر في الصدارة.