إحدى ضحايا مشاجرة البنزينة: 50 واحد اعتدوا علينا "بينهم ملثم" وأخويا عينه ضاعت

المجني عليه

A . .A

اثارت واقعة التعدي على عدد من الأشخاص داخل بنزينة شيل أوت بحدائق الأهرام، جدلًا واسعًا على مواقع التواصل الاجتماعي خلال الأيام الأخيرة.

خبط المراية بكوعه وقال لو كان عاجبك

وقالت إيمان محمد، إحدى الضحايا بالواقعة، في تصريح لـ"تليجراف مصر": “كنا راجعين من مشوار عزاء مع بعض، ودخلنا بنزينة شيل أوت حدائق الأهرام، وكان أخويا سايق العربية وفيه مجموعة شباب عاوزين يعدوا قدام العربية، وأخويا استناهم وفي واحد منهم خبط مراية العربية بكوعه، أخويا بيقوله ليه كده راح قاله لو كان عاجبك وشتم”.

اعتداء عنيف

وأكملت إيمان: "الشباب دول اعتدوا على إخواتي وأبناء عمتي بالحديد، والناس خلصت بيننا وقالوا لأخويا إنت معاك ستات في العربية والعيال دول بتوع مشاكل امشي أحسن، وفعلًا مشينا بعد الضرب والتكسير اللي حصل في العربية، وروحنا ناحية المكان بتاع البنزين، وأخويا نزل يعدل النمرة بتاعة العربية اللي باظت وفجأة لقي حد ضربة على دماغه بشومة.

50 واحد بيضربوا فينا وكلما اتصابنا

وأضافت الضحية: فجأة لقينا حوالي 50 واحد "بينهم شخص ملثم" بيضربوا فينا كلنا بدون تفرقة بين رجالة وستات، وكان معاهم عصيان بيسبول، وكسروا زجاج العربية كله، حتى عمتي اللي عندها 70 سنة وماشية بعكاز ضربوها، وأخويا أخد ضربة جامدة في عينه ضعيتها، وأخويا التاني أنفه اتكسر، وابن عمتي إيده اتكسرت".

أخويا عينه باظت

وأوضحت إيمان: “الناس خلصتنا منهم بالعافية، وجرينا بالعربية على الدائري زي المجانين علشان هم جريوا ورانا، وروحنا على المستشفى والدكاتره لما شافوا أخويا ودخل العمليات قالوا إن قرنية عينه اليمين انفجرت وعينه كده خلاص باظت وفقدت النظر، وروحنا نعمل محضر لقينا إنهم عاملين فينا محضر في مكان غير اللي حصلت فيه الواقعة، وقالوا في المحضر إن إخويا سرقهم”.

عاوزين حقنا

واختتمت الضحية حديثها لـ"تليجراف مصر" قائلة: "يرضي مين اللي حصل فينا ده، وكل ده ليه أصلا إيه اللي يخليهم يعتدوا علينا بالشكل ده وأخويا عينه تضيع وهي مصدر رزقه أصلا لأنه شغال سواق، إحنا بنستغيث وبنطالب الأجهزة الأمنية إنهم يرجعوا لينا حقنا.