طفلة تسأل عن "البنطلون".. وعلي جمعة: "أنا مش ترزي"

وجهت طفلة سؤالا للدكتور علي جمعة، مفتي الديار المصرية السابق، خلال برنامج نور الدين المذاع على قناة أون قائلة: "فى بنات بتلبس بنطلونات واسعة هل دى تنفع؟".

شرعية البنطلونات المقطعة

ورد جمعة عليها قائلا: “لما سألوني زمان وأنا في الجامعة، عن البنطلونات المقطعة واللي مش مقطعة، قولت لهم أنا مش ترزي عشان أقول إيه ينفع وإيه مينفعش، أنا بقول الأهم إنه لا يصف، لا يكشف، لا يشف”.

ليه مش بنشوف ربنا

وفي حلقة سابقة أجاب فضيلة الدكتور علي جمعة، على سؤال طفلة: "ليه مش بنشوف ربنا؟”.

وقال جمعة: “ربنا خارج الدائرة، هل إحنا نقدر نشوف أمواج الرادار، أو تيار الأشعة اللي بنعمل بها حاجات في جسمنا، الإنسان بيشوف بعين والضوء بينعكس على الحاجة، طيب فين الضوء اللي هينعكس على ربنا”.

“هنشوف ربنا يوم القيامة”

وأضاف جمعة، خلال حلقة برنامج "نور الدين"، المذاع على قنوات الشركة المتحدة، أمس الخميس: "الضوء مينفعش يتسلط على أي حاجة، وربنا ليس مخلوق ومش ممكن يكون مخلوق، ربنا خارج الدائرة الكونية التي فيها، كل المخلوقات، ويوم القيامة هنكون على طرف الدائرة وساعتها هنشوف ربنا بس إزاى منعرفش يبقى كل اللي علينا نعمل عمل صالح علشان نشوف ربنا".

وتوجه طفل آخر بسؤال “هو ربنا عنده كام سنة؟”، ليجيبه الدكتور علي جمعة قائلا: "ربنا موجود على طول، محدش بيعد لأنه سبحانه خارج الدايرة، فلا بداية ولا نهاية له ومحدش يعرف يعد لأنه مفيش زمن.. عدم وجود الزمن يخلينا نقول مينفعش السؤال ده لأن الله مختلف عننا.. فحد يقول عمر ربنا قد إيه؟ نقول ليس له عمر، لماذا؟ لأنه ليس حوله زمن".

وأوضح جمعة أن هذه الدائرة أخبرنا الله سبحانه وتعالي أن على رأسها العرش، وهو أكبر مخلوق خلقه الله سبحانه وتعالى، فالعرش مثل السقف تحته الجنة التي يعطيها للمؤمنين الطيبين الذين فعلوا الخير، وتحته النار التي يهدد بها العصاة الظالمين المفسدين الذين قتلوا الناس وأخرجوهم من ديارهم، والذين اعتدوا على الأموال والأعراض.

يُذكر أن برنامج نور الدين، يُعرض على قنوات الشركة المتحدة، ويفتح حوارا مع الأطفال والكبار حول تساؤلاتهم عن الدين والله عز وجل، إضافة إلى المشكلات الحياتية التي تواجه عباد الله وكيفية التغلب عليها، ويرد على أسئلة للمرة الأولى على لسان أطفال صغار.

يجيب البرنامج على أسئلة “فين ربنا، مش بنشوفه ليه"، وغيرها من الأمور التي يقف الآباء أمامها في حيرة شديدة دون إجابة ما جعل البرنامج محل ترقب سواء للأهالي الذين ينتظرونه لفهم الإجابة الصحيحة، أو الأبناء الذين سيجدون في البرنامج فهمًا لما يحاولوا معرفته ويثبتهم بصورة صحيحة ما يبني عندهم وعيًا ويقينًا”.