القبض على خادمة منة فضالي بعد سرقة مشغولات ذهبية وهاتف محمول

ألقت مباحث أكتوبر، القبض على خادمة الفنانة منة فضالي، بعد اتهامها بسرقة متعلقات من منزلها والفرار هاربة.

تفاصيل المسروقات

وتلقى مدير أمن الجيزة، اللواء محمد مجدي أبو شميلة، بلاغا من اللواء هاني شعراوي، نائب مدير الإدارة العامة للمباحث يفيد بحضور  الفنانة منه فضالي إلى مكتب العميد أحمد نجم، رئيس قطاع أكتوبر، وحررت محضرا بتضررها من خادمة نيجيرية الجنسية، موضحة أن المسروقات شملت 3 ساعات يد، وحقيبة يد، وهاتف محمول ماركة ريلمي، وملابس شخصية، وسلسلة ذهب، وقيراط ذهبي، وخاتم.

كاميرات المراقبة تقود لضبط المتهمة

بالبحث والتحري وفحص كاميرات المراقبة واستخدام التقنيات الحديثة، تمكن المقدم محمد راغب، رئيس مباحث أكتوبر، من القبض على المتهمة.

اعتراف المتهمة وإرشادها عن المسروقات

بمواجهتها أمام العقيد إسلام المهداوي، مفتش مباحث أكتوبر، اعترفت الخادمة بارتكاب الواقعة، وأرشدت عن المسروقات التي تم التحفظ عليها.

النيابة تأمر بحبس المتهمة 4 أيام

وتولت النيابة العامة، التحقيق في الواقعة، وأمرت بحبس المتهمة 4 أيام على ذمة التحقيقات.

تفاصيل تعرض منة فضالي للسرقة

وفي وقت سابق، أعلنت الفنانة منة فضالي تعرضها للسرقة من خادمتها الأجنبية، كاشفة تفاصيل الواقعة كاملة وتحريرها محضرًا رسميًا ضد المتهمة.

ونشرت منة فضالي مجموعة من الصور لخادمتها، عبر حسابها على منصة "فيسبوك" معلقة عليها: "البنت دي بقالها عندي سنة وشهرين اسمها سميرة ومش معاها باسبور، قولتلها هاتي باسبور أعملك إقامة".

وتابعت: "قالتلي محتاجة يومين إجازة، طلبت المكتب ييجي ياخدها على أساس إنها هتروح تجبلي باسبورها واديتها تليفون علشان معهاش وأعرف أكلمها أول حاجة، محبتش حد يعرف عنوانها وخليت المكتب يوصلها في مكان بعيد وواحدة جت أخدتها منهم وبعدين التليفون اتقفل وعملت بلوك ليا ولأمي واكتشفنا بعدها إنها سارقة كل حاجة من البيت عن طريق أكياس القمامة السودة وهي خارجة من عندنا".

وأضافت: "كان معاها شنطتها الصغيرة بعد كده لقناها واخده حلق وخاتم أمي الذهب وسلسلة ذهب كبيرة وسارقة هدوم كتير من عندي وشنط غالية، و3 ساعات، كلمت المكتب وهما حاولوا يوصلولها راحت مخلية واحدة تزعق معاهم وعملت للمكتب بلوك ودي صورها ببعض الحاجات اللي سرقتها من عندي والست دي هي المسؤولة عنها، حاولت أتواصل معاها قفلت في وشي وعملت بلوك".

واستكملت: "روحت القسم وعملت محضر بالمسروقات وادتهم رقم باسبورها وإن شاء الله يعرفوا يجيبوها، المشكلة الأساسية إني عرفت بعد كده إن البنت دي بتشتغل مع حد في نيجيريا بتاع مخدرات وإنها متصابة كذا مرة بالرصاص، مش عارفة إزاي الناس دي بتدخل البلد اللي زي دول، لازم نحرص منهم للأسف أنا عملت خير معاها، ربنا اللي يعلم والناس كلها اللي جاتلي بيتي شافت أنا كنت بتعامل معاها إزاي بس اكتشفت إن دول معندهمش ضمير وكدابين وطبعهم الخيانة".

واختتمت: "هتقولولي وإيه اللي يخليكي تشغلي واحدة أجنبية أقولكم لأني جربت مصريين كتير ومنهم اللي اتهجمت على أمي وهي لوحدها وأنا كنت في التصوير وفي اللي كانت أخلاقها مش حلوة وفي اللي كانت بتصوني وأنا قاعدة وتبعت للناس صوري فقولت خليني أجيب حد لا يعرفني ولايعرف لغتنا ويمكن يكونو أحسن مع إن في مصريات كتير كويسين بس مش بيرضو يباتو وأنا لازم حد يكون مع أمي طول ما أنا في الشغل لإن مقدرش أسبها لوحدها، أنا بنزل الكلام ده وربنا يعلم أنا كنت بحب البنت دي قد إيه، لكن اكتشفت حقيقي اتقي شر من أحسنت إليه".

اقرأ أيضًا:

"سرقت دهب وملابس".. منة فضالي تتقدم ببلاغ ضد خادمتها الأجنبية بأكتوبر