“المحامي خد الموبايلات وقال متجبش سيرة”.. سائق أحمد الدجوي يكشف كواليس مثيرة أمام النيابة (خاص)

تواصل “تليجراف مصر”، نشر تفاصيل التحقيقات في واقعة وفاة الدكتور أحمد الدجوي، حفيد الدكتورة نوال الدجوي، والتي لا تزال تثير حالة واسعة من الجدل، في ظل تضارب الروايات والاتهامات المتبادلة بشأن ملابسات الوفاة.

تفاصيل الواقعة

وكشفت التحقيقات عن شهادات جديدة تتعلق بالساعات الأولى عقب اكتشاف الوفاة داخل الفيلا، حيث أدلى السائق الخاص بالراحل بأقوال تضمنت تفاصيل وصفها بـ “المهمة”، بعدما أكد أمام جهات التحقيق أنه شاهد أحد المحامين المقربين من الراحل وهو يأخذ الهواتف المحمولة الخاصة بالدكتور أحمد الدجوي ويضعها داخل حقيبته عقب وقوع الحادث مباشرة.

وتأتي تلك الأقوال في وقت شهدت فيه مواقع التواصل الاجتماعي حالة من الجدل حول مصير الهواتف الخاصة بالمتوفى، وما إذا كانت قد تعرضت للسرقة من داخل الفيلا، قبل أن تكشف التحقيقات الرسمية تفاصيل جديدة بشأن الواقعة.

وجاءت أقوال السائق كالتالي:

اسمي سيد أبو بكر يوسف عندي 43 عامًا، أعمل سائقًا.

س: ما قولك فيما تبين للنيابة العامة من تفريغ محتوى وحدة تخزين آلات المراقبة والخاص بالعقار محل الواقعة من حضور شخص لمحل الواقعة عقب حدوثها مباشرة مرتديًا بدلة رسمية رمادية اللون حاملًا حقيبة يد سوداء اللون ومكث بمحل الواقعة إلا أنه وعقب برهة قصيرة غادر محل الواقعة "اطلعناه على ذلك المقطع المرئي"؟

ج: اللي ظاهر في الفيديو ده المحامي اللي اسمه ياسر صالح.

س: ومن هو المدعو ياسر صالح سالف الذكر، وما هي كافة بياناته تحديدًا؟

ج: أستاذ  ياسر صالح ده المحامي بتاع المرحوم أحمد الدجوي الله يرحمه، ومعرفش بقيت بياناته إيه، هو بس ساكن في بالم هيلز برضه.

س: وما هي صلتك وعلاقتك بالمدعو سالف الذكر تحديدًا؟

ج: مفيش أي صلة بيني وبينه غير إنه المحامي بتاع أحمد الدجوي الله يرحمه.

س: وما مدى مداومة تردد المدعو سالف الذكر على محل الواقعة قبيل الحادث تحديدًا؟

ج: هو كان بيجيله كتير بحكم إنه المحامي بتاعه وصاحبه، وكمان مراته صاحبة مدام نسرين مرات المرحوم.

س: ومتى تحديدًا حضر المدعو ياسر صالح لمحل الواقعة آنذاك؟

ج: هو جه الفيلا يوم 2025/5/25 على حوالي الساعة 3 مساءً تقريبًا.

س: وما هو سبب حضوره لمحل الواقعة بذلك الوقت تحديدًا؟

ج: اللي أعرفه إن الدكتور أحمد الدجوي كان عامل اجتماع بينه وبين المحامين بتوعه اللي هما ياسر صالح وإيهاب عاصم، وعشان كده ياسر جه الفيلا.

س: وما هو التصرف الذي بدر من المدعو ياسر صالح حال وصوله لمحل الواقعة آنذاك؟

ج: هو أول ما وصل كنا عرفنا حالة الوفاة والدنيا كانت مقلوبة وطالبين الإسعاف، وعرف ساعتها ياسر إن الدكتور اتوفى، راح واخد بعضه وطلع على فوق مكان الحادث في أوضة الدرسينج روم، وأنا كنت واقف بين الدرسينج روم والحمام علشان كنت نقلت الجثمان زي ما قلت قبل كده، وشوفت أ/ ياسر خد الموبايلات بتاعت المرحوم أحمد الدجوي وحطها في شنطته، ولما لقاني شوفته راح قايلّي "مجبش سيرة لحد"، وراح واخد بعضه ونزل من الأوضة، ومعرفش بعد كده هو راح فين، وشوية وشوفته في الفيلا تاني.

س: وأين كانت الهواتف المحمولة آنفة البيان آنذاك؟

ج: كانت على الترابيزة الخشب اللي على شمال اللي داخل أوضة الدريسنج.

س: وكم عدد الهواتف المحمولة التي كانت متواجدة آنذاك؟

ج: كانوا تليفونين.

س: خاصة من هذين الهاتفين تحديدًا؟

ج: هما بتوع الدكتور أحمد الله يرحمه.

س: صف لنا ماهية أنواع وأوصاف الهواتف المحمولة الخاصة بالمتوفى إلى رحمة مولاه آنفة البيان؟

ج: هما تليفونين اللي أنا شفت أ/ ياسر خدهم، تليفون المرحوم الآيفون ١٤ اللي بيكون مع المرحوم على طول، وكمان التليفون سامسونج، بس معرفش ألوانهم إيه بصراحة علشان بيكون عليهم كفرات.

س: وما الذي دفع المدعو ياسر صالح إلى الاستيلاء على الهواتف المحمولة الخاصة بالمتوفى إلى رحمة مولاه آنذاك؟

ج: معرفش هو خد الموبايلات ليه.

س: من تحديدًا كان متواجدًا بالغرفة محل الواقعة آنذاك؟

ج: هو مفيش حد غيري أنا وأ/ ياسر صالح، وأ/ إيهاب عاصم زي ما قلت لحضرتك.

س: ومن تحديدًا الذي أبصر المدعو ياسر صالح حال استيلائه على الهواتف المحمولة الخاصة بالمتوفى إلى رحمة مولاه؟

ج: اللي شاف ياسر وهو بياخد الموبايلات دي أنا وأ/ إيهاب عاصم.

س: وما هو التصرف الذي بدر من المدعو / إيهاب عاصم آنذاك؟

ج: هو معملش حاجة ومتكلمش معاه، ومعترضتش على اللي حصل وإن أ/ ياسر خد الموبايلات.

س: وهل أبصرت المدعوة نسرين سعيد محمد عبد المنعم محمود المدعو سالف الذكر حال استيلائه على الهواتف آنفة البيان؟

ج: لا.

س: وما الذي حال دون ذلك؟

ج: علشان هي كانت منهارة إن جوزها انتحر ومات.

س: وهل قمت بالاستفسار حول التصرف الذي بدر من المدعو ياسر صالح باستيلائه على الهواتف المحمولة الخاصة بالمتوفى آنذاك؟

ج: هو لما شافني شوفته وهو بياخد الموبايلات بتاعة المرحوم بصلي وقالّي "مجبتش سيرة لحد".

س: وما الذي قررته له آنذاك؟

ج: أنا قلتله ماشي وشاورتله براسي إني موافق، بس أنا قلت دلوقتي علشان أرضي ضميري.

س: ما تعليلك فيما شهدت سلفًا بتحقيقات النيابة حال سؤالك من عدم ذكرك لتلك الواقعة تحديدًا "تلوناه عليه أقواله"؟

ج: أنا يا باشا غلبان وعلى الله، وأ/ ياسر قالّي "مجبتش سيرة لحد" لما شافني إني شوفته خد الموبايلات، وأنا بخاف على لقمة عيشي، ففعلاً مجبتش سيرة عن الموضوع ده.

س: سبق وشهدت بمغادرة المدعو ياسر صالح لمحل الواقعة عقب استيلائه على هواتف المتوفى، إذن إلى أين كانت وجهة المدعو ياسر صالح آنذاك؟

ج: أيوه، أنا شوفته نزل الدور اللي تحت وأنا فضلت مع الجثة ومدام نسرين.

س: وهل عاود المدعو سالف الذكر مرة أخرى لمحل الواقعة؟

ج: أيوه.

س: متى تحديدًا عاود سالف الذكر لمحل الواقعة إذن؟

ج: أنا شوفته تاني في الفيلا بعد ما مشي ونزل الدور اللي تحت بحوالي نص ساعة.

س: وهل كانت بحوزة سالف الذكر هواتف المتوفى إلى رحمة مولاه والتي سبق وأن استولى عليها كما شهدت سلفًا بالتحقيقات؟

ج: أنا مشوفتهاش معاه من ساعة ما خدها وحطها في شنطته، معرفش كانت معاه لما جه تاني ولا لأ.

س: وما هي مواصفات تلك الحقيبة آنفة البيان والخاصة بالمدعو ياسر صالح تحديدًا؟

ج: هو شنطة سودة صغيرة بحزام أسود طويل بيتعلق على الكتف، وهو كان معلقها على كتفه ساعة ما حط فيها الموبايلات بتاعت المرحوم.

س: وهل تلك الحقيبة آنفة البيان هي ذاتها الحقيبة الظاهرة بحوزة المدعو ياسر صالح بالمقطع المرئي سالف العرض عليك؟

ج: أيوه، الشنطة اللي كان لابسها في الفيديو دي هي هي اللي حط فيها الموبايلات بتاعت المرحوم.

اقرأ أيضا:

مستحيل يكون انتحر.. زوجة “الدجوي” تتهم أقاربه بقتله أمام النيابة (خاص)

بالمستندات.. نص التحقيقات يكشف تفاصيل الساعات الأخيرة في حياة أحمد الدجوي (خاص)

“كان جاي على قعدة صلح”.. شقيق أحمد الدجوي يكشف كواليس الساعات الأخيرة ويغير مسار القضية