"خايفة أموت في الشارع".. مسنة من المنوفية تستغيث بعد طردها من منزل ابنها

أطلقت الحاجة رضا، البالغة من العمر 71 عامًا، والمقيمة بقرية جروان التابعة لمركز الباجور بمحافظة المنوفية، استغاثة عاجلة إلى المسؤولين، مطالبة بتوفير غرفة بسيطة تؤويها وتحميها من قسوة الشارع، بعدما أصبحت فجأة بلا مأوى.

وقالت الحاجة رضا، في تصريحات خاصة لـ"تليجراف مصر"، والدموع تملأ عينيها: "كنت عايشة في أمان الله في بيت ابني، وفجأة قرر حفيدي يتجوز وطلب مني أخرج من البيت علشان يفرشه. ملقتش مكاني ولا لقيت حد ياخدني، وفجأة لقيت نفسي في الشارع من غير سقف يحميني من البرد أو الحر".

"بقيت وحيدة ومليش حد"

وأضافت السيدة المسنة أنها أصبحت وحيدة تمامًا، قائلة: "أنا ماليش حد يضمني، إخواتي كلهم ماتوا وسابوني لوحدي، ومفيش أي مصدر رزق يساعدني غير معاش ما بيكملش 2000 جنيه، ومش قادر حتى يأجرلي أوضة أعيش فيها".

مرض الابن وعجزه عن مساعدتها

وعن موقف نجلها، أوضحت الحاجة رضا بحزن: "ابني ملوش ذنب، المرض هدّه وخلاه مريض سكر لحد ما فقد بصره وبقى كفيف، ومبقاش قادر يعمل حاجة أو يقف قدام ابنه اللي طردني علشان يتجوز، فبقينا إحنا الاتنين ضحايا الظروف".

أمنية أخيرة قبل الرحيل

واختتمت الحاجة رضا حديثها بمناشدة إنسانية للمسؤولين، لخصت خلالها أمنيتها الأخيرة قائلة: "أنا مش طمعانة في الدنيا، كل اللي نفسي فيه أوضة بـ4 حيطان في قريتي جروان علشان أفضل وسط ناسي، وخايفة جدًا أموت لوحدي في الشارع ومحدش يحس بيا، ولا يكتشف موتي إلا من ريحتي بعد ما أعفن.. نفسي أموت مستورة وأتدفن في مقابر بلدي جنب الناس اللي بحبهم".