شقيق ضحية "فرن المنيب" يروي تفاصيل مقتل "يوسف" على يد عامل (فيديو)

في جريمة هزت منطقة المنيب، قُتل الطالب يوسف العدوي داخل فرن والده بعدما طعنه عامل من رقبته فجرًا داخل الفرن. 

تفاصيل الواقعة المأساوية 

وقال محمد العدوي، شقيق المجني عليه لـ"تليجراف مصر ": “يوسف سقط سنوات علشان يساعد والدي وهو اللي كان بيشتغل مع والدي، وأنا بشتغل لوحدي في شغل تاني”. 

وأضاف: “يوسف كان بيدرس في الصف الثاني الثانوي الأزهري، ورسب كذا سنة علشان يشتغل في الفرن ويساعد والدي”، متابعًا: "يوم الواقعة راح الفرن الساعة 5 الصبح علشان يبدأ شغل بدري لأن عنده امتحان، وكان والدي هييجي له الساعة 7 علشان يروح يمتحن".

تربص له وذبحه

وواصل شقيق الضحية: “دخل يوسف الفرن وكان المتهم محمود مستنيه هناك وفتح الفرن قبل ما أخويا يدخل وتربص له، وطعنه من رقبته لحد ما مات، واللي بلغني واحد اسمه سيف كان معدي جنب الفرن، سمع يوسف بينادي على والدي ولقاه مرمي على الأرض، افتكره نايم وحاول يصحيه، لقاه مذبوح”.

واستكمل قائلاً: "جينا لقينا أخويا مطعون في رقبته والمنظر كان بشع، اتصلنا بالإسعاف والشرطة جت، بس كان فارق الحياة".

خلاف قديم من سنتين

واستدرك في حديثه قائلاً: "إحنا عيلة صعيدية من أسيوط، عايشين في المنيب جيران لهم من 40 سنة، وإخوات المتهم محمود ده عندهم أفران مدعمة حكومية، وإحنا شغلنا سياحي خاص، مفيش أي تداخل، وخاله زارنا من 3 أيام هو ومراته علشان والدتي تعبانة، ومكانش فيه أي مشاكل، بس حصلت مشادة من سنتين بين أخويا ومحمود بسبب شغل، واتخانقوا والعمال فضّوا بينهم، وراح اشتكى لوالدي ووالدي اعتذر والموضوع خلص، بس من ساعتها وهو متربص لأخويا".

تجارة الخبز 

وأضاف: “الخباز اللي بيعجن بييجي الساعة 7، بس محمود كان بييجي بدري. اليوم ده جه الساعة 4 الفجر علشان يستنى أخويا، و باب الفرن عندنا مفتوح دايمًا علشان المحلات اللي جنبنا شغالة 24 ساعة، وبنستلم دقيق وأنابيب”. 

وأشار:  "في المحضر، القاتل قال المتهم إنه قتله علشان كان بيخصم له من أجره بسبب تأخيره، وده كذب، لأن الشغل عندنا بالإنتاج وبيتحاسب بالشيكارة، وهل ده سبب يقتل بني آدم؟ ما راحش لأخويا الكبير أو والدي ليه؟ حسبي الله ونعم الوكيل".

وعن سبب ارتكاب الجريمة بعد عامين، قال: "الفرن القديم كان فيه كاميرات، ولما نقلنا لمحل جديد من سنة مركبناش كاميرات لسه، وهو استغل كده، بيقول الشيطان أغواه، واشترى سكينة جديدة ورتب لكل حاجة، وجاله اتصال وهو في الفرن واستنى أخويا".

"والدتي متعرفش.. ووالدي حالته صعبة"

وعن حالة الأسرة، أوضح: “والدي حالته يرثى لها، ووالدتي لحد دلوقتي متعرفش بالخبر، هي عندها جلطتين وبتسأل على يوسف كل شوية، بنقول لها في الفرن أو في الامتحان،  القاتل مقتلش يوسف بس، قتل عيلة كاملة”. 

عكاز والدي ونطالب بالإعدام

واختتم محمد العدوي حديثه: “بطالب بالقصاص والإعدام علشان يبقى عبرة للكل، وإلا الأمور هتتفاقم وتقلب لصراعات دموية، وكان فيه جيرة وصداقة ودلوقتي كل حاجة انتهت، بطالب الرأي العام يقف معانا علشان إعدام القاتل في أسرع وقت، إحنا في نار ومش بنام من هول المنظر، إحنا متعلمين وبنثق في القضاء العادل، بس عايزين القصاص السريع، ولو القانون مخدش مجراه هنعرف ناخد حقنا”.

بلاغ بالجريمة 

ولقي صاحب فرن مصرعه، إثر تعرضه لطعنة نافذة في الصدر بسلاح أبيض (مطواة)، على يد عامل لديه، بدائرة قسم شرطة الجيزة، بسبب خلافات بينهما على العمل.

مصرع صاحب فرن على يد عامل في مشاجرة

وتلقى اللواء محمد مجدي أبو شميلة، مساعد الوزير لأمن الجيزة، إخطارًا من اللواء هاني شعراوي، نائب مدير الإدارة العامة للمباحث، يفيد بمصرع شاب داخل نطاق القسم.

وعلى الفور، وجه العميد عمرو حجازي، رئيس قطاع الغرب، بسرعة انتقال قوة أمنية برئاسة المقدم هشام فتحي، رئيس مباحث الجيزة، والنقيب أحمد شنب، معاون المباحث، إلى محل الواقعة.

وبالانتقال والفحص، تبين مقتل صاحب فرن يبلغ من العمر 23 عامًا، إثر إصابته بطعنة نافذة في الصدر أودت بحياته في الحال، على يد عامل لديه يبلغ من العمر 34 عامًا، على خلفية خلافات تتعلق بسير العمل.

الإجراءات القانونية

وتمكنت القوات من ضبط المتهم، وبمواجهته أمام المقدم هشام فتحي اعترف بارتكاب الواقعة، وأرشد عن السلاح الأبيض المستخدم.

وتم نقل الجثمان إلى مشرحة المستشفى تحت تصرف النيابة العامة، فيما أمرت النيابة بتشريحه لبيان سبب الوفاة والتصريح بالدفن، وحبس المتهم 4 أيام على ذمة التحقيقات، واستكمال الإجراءات القانونية اللازمة.

اقرأ أيضا:

العثور على جثمان شخص داخل فرن شهير بمنطقة المنيب

مصرع صاحب فرن على يد عامل في مشاجرة بالجيزة بسبب خلافات العمل