صاحبة عربة القهوة تكشف كواليس دهس هدير: مش هنبيع دمها (فيديو)

في أول ظهور إعلامي لها، كشفت نبيلة فوزي، صاحبة مشروع عربة القهوة التي شهدت واقعة دهس هدير بحدائق الأهرام، تفاصيل جديدة حول الحادث، مؤكدة أن الضحية كانت تعمل لديها منذ مارس الماضي.

هدير  بتشتغل معانا من مارس

وقالت نبيلة فوزي في تصريحات خاصة لـ"تليجراف مصر": عربة القهوة دي شراكة بيني وبين الأستاذة كريمة، إحنا صديقات وأخوات، وأنا بديرها وهي بتديرها وبنشتغل سوا".

وأضافت: "هدير كانت بتشتغل معايا ومع كريمة من شهر مارس وكانت بتيجي من الساعة 7 أو 8 الصبح لحد الساعة 4 العصر، على العربة اللي حصلت فيها الحادثة".

وردًا على تصريحات أسرة الضحية، قالت نبيلة: "لما والدتها تقول إنها لا تعمل على عربة قهوة ولا تعرفنا، فأنا بسأل: إزاي بنتها بتخرج يوميًا من الصبح للعصر وما تعرفش هي فين أو بتقبض منين؟ الكلام ده مش حقيقي".

وتابعت: "أنا هنا لأكذب كلام والدتها وأخيها، خاصة أن أخيها هو من تسلم جثمانها من مكان العربة.. هي لم تكن تعبر الطريق ولم تكن تشتري حاجة، بل كانت واقفة في عملها، وفيه شهود من المحلات المجاورة زي صاحب صالون التجميل والناس في الشارع"."

السيارة كانت ماشية بسرعة جنونية

وحول لحظة الحادث، أوضحت: "وقت الحادثة ماكناش موجودين، لكن الناس اتصلت بينا فجينا بسرعة وماكناش عارفين مين المصابة، فلقينا كنزي وحبيبة بخير وهدير هي اللي اتوفت".

وأضافت: "شوفنا الفيديوهات اللي صورتها صاحبة صالون التجميل وظهر فيها الشاب وهو بيطلب من الناس ماحدش يقرب من البنت ويتكلم معاه هو لأنه كان سايق. ده موقف شهامة منه لكنه لا يغير الحقيقة".

وشددت: "السيارة كانت تسير بسرعة جنونية أدت لتحطم جسد الفتاة، ودي مش سرعة شخص بيتعلم القيادة بل سرعة هائلة".

وضع أسرة الضحية المادي

واستنكرت نبيلة ما تردد عن وضع أسرة الضحية المادي، قائلة: "سمعنا اللي بيقول إنها معلمة وإنهم ميسورين ماديًا ومش محتاجين للشغل،  ونتمنى من الله ماحدش يحتاج للشغل، لكننا نملك عربة القهوة دي وبنقف عليها بنفسنا وبنبيع ونوصل الطلبات ونتعامل بشكل طبيعي جدًا".

وأكدت: "الشغل مش عيب ولا حرام طالما بنؤديه بكل أدب واحترام، والناس بتعاملنا بكل تقدير، وهدير كانت هادئة جدًا ومركزة في شغلها فقط".

واختتمت مناشدة: "أتمنى مايضيعش حق البنت، فليه تنكروا عملها وتبيعوا دمها بالشكل ده؟ إحنا كزملاء عمل متألمين جدًا للي حصل، وهي دلوقتي في مكان أفضل، وندعو الجميع لعمل صدقة جارية على روحها بدلاً من الجدال، وإحنا واثقين في القضاء والشرطة والنيابة في استعادة حقها".

اقرأ أيضًا:

دماء على عربة قهوة.. حكاية "بنت الأكابر والشقيانة" في حدائق الأهرام

ضبط المتهمة بدهس فتاة تعمل على عربة قهوة بحدائق الأهرام