دجال قلب حياتنا.. ضحية والدها "رجل أعمال الموسكي" تكشف تفاصيل مثيرة

كشفت ابنة رجل أعمال الموسكي، ضحية الاعتداء والاحتجاز والإكراه على التوقيع على أوراق مجهولة، تفاصيل وكواليس التعدي عليها وعلى شقيقتيها وخلافتهن مع والدهن.

ضحية الاحتجاز والتعدي من رجل أعمال الموسكي

وقالت الفتاة في تصريحات لـ“تليجراف مصر”: “أنا أسفة طبعاً على اللي أنتوا شوفتوه في الفيديو، بس كنت حابة أوضح إن إحنا كنا أسرة عايشين مستقرين لحد ما دخل في حياتنا دجال ضحك على والدي باسم الدين، والراجل ده زوجته التانية هي اللي جايباه، كانت مدخلاه البيت على أساس إن البيت فيه طاقة سلبية وإن ده حد هيقرأ قرآن”.

وأضافت: “الراجل ده من ساعة ما دخل بيتنا وإحنا بيتنا اتخرب، والدي بدأ يتصرف تصرفات مش طبيعية، وبدأ يشوف ناس مش موجودة، يتكلم مع ناس مش موجودة، يقولنا سلموا على الحجاج دول ناس أنتوا ماتشوفوهاش بس أنا بشوفها، وكان بيدينا مياه يقولنا المية دي جاية لي من السما”.

“اتفاجئنا إنه مطلق ماما”

واستدركت: “أنا اتفاجأت من فترة إنه مطلق ماما، وبعت لها هدومها في شنط زبالة، وطردنا من بيته، وطرد والدتي وطرد أخويا من شغله، لحد ما بعت لنا رسالة تهديد إنه عايزنا، وقلنا نروح نتكلم معاه”.

وواصلت “اتفاجئنا هناك إنه جايب لنا بلطجية احتجزونا، وأخويا اللي من زوجته التانية، أمرهم إن هما ياخدوا تليفوناتنا ويفتحوها، ودخلنا إحنا المكتب وأول ما دخلنا قال لنا مش عايز أسمع صوت أنتوا جايين النهاردة عشان هتموتوا”.

وأكملت: “وجايب لنا واحدة صغيرة وبيقولنا دي مراتي الـ 3 وجايبها لكم، واتجوزتها أصغر منكم وجايبها يعني تتفرج على اللي هو هيعمله فينا، ونزل علينا ضرب بالشوم اللي الدجال مديها له، مضانا على ورق وملحقتش أبص عليه، وفضل يضرب فينا، لدرجة إن أنا دماغي كانت بتجيب دم، وكان عايز يموتني”.

مؤامرة من دجال

وأضافت: “حاولنا نحل معاه كتير مش عارفين، ناس كتير حاولت تقعد تتكلم معاه وكان رافض، وعايشين في تهديد ورعب ومش عارفين نعمل معاه حاجة، لحد ما جات لنا فلاشة شوفنا فيها اللي حصل  اتفاجئنا إن في مؤامرة على والدي من الدجال وزوجته التانية وابنه، وإن هما بيحرضوه على اللي بيحصل ده، فإحنا خايفين عليه وبنحبه وفي نفس الوقت خايفين منه”.

الدجل والشعوزة يتحكمان بالأب

وتابعت: “أي راجل مؤمن بربنا ميدخلش نفسه في السكة دي، عشان آخرتها مش حلوة، وقالت إن والدها مكنش بيسمع لنا، الراجل ده الأول وقّع بينه وبين إخواتي، وخلى والدي كِره إخواتي وشافهم أعداء، وبعد كدة شافنا إحنا نفس الكلام، إن إحنا عايزين نسمّه، وإن إحنا عايزين نؤذيه هو وعياله، وإنه سافر ألمانيا، وطبعاً الكلام ده مش موجود، وكان بيتّهم أمي إن هي بتعمله أسحار، وأنا أمي أصلاً يعني هو عايش مع زوجته التانية مش مش عايش مع والدتي، والدتي وهما في بيت واحد بس هو عايش مع الزوجة التانية فوق ووالدتي في الدور اللي تحت”.

والدتي تعيش مع ضرتها 

واختتمت تصريحاتها قائلة: “والدتي ماتت وكانت مريضة كانسر وعندها عصب سابع، وعايشة في قهر طول عمرها، يعني كفاية إنها مستحملة عيشة إن هي تعيش مع ضرتها، بس أمي كل اللي في دماغها إن هي عايشة عشان تربي عيالها وبس، ماتعرفش أي حاجة عن الدنيا غير إن هي بتربي عيالها وعايشة لعيالها”.

اقرأ أيضا:

خلافات جيرة السبب.. تفاصيل تعدي أب ونجله على شخصين