أبو الليف عن أزمته مع تامر حسني وحماقي: بغني من قبل ما يتولدوا

تحدث الفنان نادر أبو الليف، عن أزمته مع تامر حسني ومحمد حماقي، بسبب أغنية “تاكسي”، وخلافه مع نقابة المهن الموسيقية، ورأيه في مطربين المهرجانات.

أزمة أبو الليف مع تامر حسني وحماقي 

وقال أبو الليف، خلال لقائه في برنامج “المنسي” علي قناة “هي”، إنه “لم يحارب تامر حسني وحماقي، أنا بغني من قبلهم، دي حقيقة أنا بغني من سنة 1983 هما كانوا فين وقتها؟، لسه متولدوش”.

وأضاف أن “الموضوع مش محاربة أنا أترجم الكلام اللي أنا بقوله إني بغلط وبهين في نجم، مش هذكر اسمه لأنه حبيبي، وأنا بحبه جدًا وما محبة إلا بعد عداوة وأصلًا مكنش في عداوة”.

أغاني المهرجانات

وعن رأيه في مطربين المهرجانات، قال أبو الليف “طول ما إحنا بنسقف يبقى خلاص، النهارده الموضوع بقى تنطيط وإسفاف وانحلال وتسيب، مفيش أي سيطرة، دلوقتي في وجهل، وهما أصبحوا متواجدين على الساحة واتفرضوا عليها”.

أزمة أبو الليف مع نقابة المهن الموسيقية 

وكشف أبو الليف، تفاصيل أزمته مع نقابة المهن الموسيقية، قائلًا “معاشي بقى 1750 جنيه، ومصطفى كامل عايز ينتقي بالأعضاء، وكان في مكالمة بيني وبينه وقالي المعاش هيزيد، ولكن وقت أزمتي الصحية كلمت النقابة وقالولي مش هيقدروا يدفعوا غير 15 ألف جنيه”.

وتابع “زملائي في النقابة محكومين غصب عنهم، هيعملوا إيه هيدوني من جيبهم؟ أنا مبشحتش ولا بتسول، أنا صرفت كذا النقابة المفروض تديني 75% منهم، مش يقولي أقصى حاجة 20، أصل أنت اتعالجت في مستشفى خاصة راميني لغاية ما يجيلي التحويل من النقابة، مش عايز يديني جلسة أكسجين علشان نفسي رايح خليت المدام تدفع التذكرة علشان يلحقوني”.

وأتم أبو الليف، “أنا روح لازم يكون ليا اهتمام وقيمتي كبني آدم، وفي اختلاف في التعامل بين نقابة المهن الموسيقية ونقابة الممثلين، دكتور أشرف زكي مبيسبش حد، ومش لازم يتعمل جواب تحويل على المستشفى علشان يكشفوا على الممثل، بيروحوا بالكارنيه وخلاص، ولو أي مشكلة عند أي ممثل تلاقي أشرف زكي بيجري، وكله بيجري يحاوط عليه ويساعد الممثل ويقف معاه، أنا فين النقابة بتاعتي؟ يحسوا بـ زميلهم والمحنة اللي دخلها”.