الشريعي: علي محمود "مشروعي" والأهلي شريكي فيه.. وطول ما بيكسب أنا بكسب

أيمن الشريعي

A . .A

أكد أيمن الشريعي، رئيس نادي إنبي، أن لاعب الأهلي علي محمود يُعد أحد أبرز المشاريع التي عمل عليها داخل قطاع الناشئين بالنادي، مشيرًا إلى أنه كان وراء استمراره وتصعيده إلى الفريق الأول، قبل انتقاله إلى القلعة الحمراء.

وقال الشريعي، في تصريحات عبر قناة ON Sport: "علي محمود ده مشروع أيمن الشريعي، كان خلص مع قطاع الناشئين وخد الاستغناء بتاعه، وأنا اللي كلمته وقلتله ارجع، هتقعد 6 شهور في بايونير وبعدها هطلعك الفريق الأول، وده اللي حصل بالفعل".

أيمن الشريعي: علي محمود قعد سنة في إنبي بدون لعب

وأضاف: "من يوم ما مسكت رئاسة النادي وأنا مؤمن إن قوة إنبي في قطاع الناشئين، وكنت بتابع مباريات الناشئين أكتر من الفريق الأول، لأن مينفعش يبقى عندك مصنع وتقفله وتروح تستورد".

وتابع: "علي محمود قعد سنة في الفريق الأول من غير مشاركة، لكن كنت بدعمه باستمرار، وكنت واثق إن فرصته هتيجي، ولما شارك مع حمزة الجمل أثبت نفسه وكسر الدنيا".

وكشف رئيس إنبي عن طبيعة الاتفاق مع الأهلي في صفقة انتقال اللاعب، قائلًا: "أنا عملت فكرة جديدة، وهي الشراكة مع الأهلي في علي محمود، وطول ما الأهلي بيكسب من اللاعب أنا كمان بكسب".

وأوضح الشريعي أن الاتفاق يضمن حصول إنبي على عوائد مالية مستقبلية مرتبطة باللاعب، مضيفًا: "حتى لو علي محمود خرج إعارة أو حقق أي عائد، إنبي بيكون ليه نصيب، لأنها شراكة حقيقية بين الناديين".

واختتم تصريحاته قائلًا: "الشراكة زي ما تكون إحنا الاتنين شركاء في عربية، مش لازم أكون راكبها علشان أكسب، طول ما العربية شغالة الاتنين بيحققوا عائد".