بعد أزمته الصحية.. أحمد موسى: تحملت الألم 5 شهور عشان المشاهد

الإعلامي أحمد موسى

A . .A

كشف الإعلامي أحمد موسى، تفاصيل أزمته الصحية التي تعرض لها خلال الأشهر الماضية، مؤكدًا أنه واصل تقديم برنامجه رغم معاناته، ولم يعلم بأزمته سوى أفراد أسرته.

مباخدش إجازات كتير

وقال أحمد موسى، خلال تقديمه برنامج "على مسئوليتي": "أنا عادةً من الناس اللي مباخدش إجازات كتير، وموجود مع حضراتكم 43 سنة بشتغل في الأهرام، بفضل الله سبحانه وتعالى، عمل متواصل وجهد كبير، وبشتغل في هذا المكان المحترم والمتميز، وهذه القناة بقالي فيها 12 سنة متصلة بفضل الله".

وأضاف: "طبيعة مهنتنا فيها متاعب وسنوات من الجهد وساعات عمل طويلة ومشقة لازم تتحملها، أنا بقالي خمس شهور، من بعد العيد الصغير وإجازته، رجعت وأنا في ظرف صحي، لكن محدش كان يعرف غير ولادي وبيتي بس".

خمس شهور مبتابعة مع أطباء في مصر

وتابع: "كنت بشتغل غصب عني عشان المشاهد، وحضراتكم، والبلد، لأن في ظروف معينة ما ينفعش تسيب الدنيا وتمشي، وكنت باخد مسكنات عشان أقدر أطلع على الهواء، وكنت لازم أتحمل".

وأوضح أنه تابع حالته الصحية داخل مصر على مدار خمسة أشهر، قائلًا: "خمس شهور كاملة وأنا بتابع مع أطباء في مصر، لهم كل الشكر والتحية، وكمان مع الدكتور خالد عبد الغفار وزير الصحة، ومش عايز أقول لحضراتكم قد إيه عندنا منظومة طبية ممتازة جدًا جدًا".

الطبيب الألماني أشاد بالمستوى الطبي في مصر

وأشار إلى أن الطبيب الذي أشرف على علاجه في ألمانيا أشاد بالمستوى الطبي في مصر، مضيفًا: "لما رحت ألمانيا، الدكتور أول ما شافني، أول حاجة اتكلم فيها كانت الطب في مصر، والتقارير اللي راحت له قبل ما أروح، وأشاد إشادة هائلة بالأطباء في مصر، وبالتقارير والتحاليل والأشعات والرنين، وكانت إشادة كبيرة جدًا بمصر والطب في مصر".

ووجه نصيحة للجمهور بضرورة الاهتمام بالرياضة، قائلًا: "الحمد لله بفضل الله سبحانه وتعالى، وبحمد ربنا على كرمه ونعمه، وعايز أقول لحضراتكم من خلال التجربة دي: الرياضة، الرياضة، بنصح الناس كلها، لو عندك ربع ساعة اعمل فيها رياضة، أهم شيء، السبب اللي إحنا فيه كله إن معندناش وقت نعمل رياضة، لا، لازم تعمل رياضة، اتعلمت الدرس ده، وبقيت أي خمس دقايق عندي أعمل فيها رياضة، وأنا قاعد أو واقف أو حتى في السرير، المهم أتحرك، لأن الحركة مهمة جدًا، فأرجوكم الرياضة".