مأساة الطفلة "مكة" بسبب "غلطة صيديلي".. والأم تستغيث: صرفولها علاج ذهان بدل البرد

روت سيدة تُدعى سامية الجمل مأساة عاشتها مع ابنتها بعد صرف إحدى الصيدليات دواء خطأ، أدى إلى تعرض ابنتها "مكة" إلى وعكة صحية خطيرة.

وقالت الجمل في منشور لها عبر صفحتها بموقع التواصل الاجتماعي فيسبوك: “أنا عمري ما كنت أتمنى أكتب الكلام ده لكن اللي حصل مع بنتي مكة كان ممكن يضيعها بسبب خطأ ما كانش لازم يحصل، وبكتب قصتنا النهارده عشان أحكي الحقيقة، وأطالب بحقي، وكمان أحذر أي أب أو أم إنهم يتأكدوا من أي دواء قبل ما يخرجوا من الصيدلية”.

وأضافت: “بنتي كان عندها برد، فاتصلت بالصيدلية في زهراء المعادي، وهي صيدلية معروفة جدًا، وبنتعامل معاها من زمان، وبعتنا الروشتة على واتساب، ولما الدواء وصل بدأت أدي مكة أول جرعة من دواء البرد وبعدها البنت نامت”.

تعرض حياة طفلة للخطأ بسبب صرف دواء خطأ 

وتابعت: “تاني يوم روحنا النادي، وفجأة لاقيت بنتي مش قادرة توقف على رجليها، وبوقها كله اتملّى دم، وجسمها كله كأنه اتشل، وعينيها كانت بتلف لفوق، وفي اللحظة دي حسيت إن بنتي بتموت بين إيديا”.

وأردفت: “روحنا أنا وأخوها على مستشفى خاصة، وكانت هناك دكتورة ربنا يجازيها كل خير، طلبت تشوف روشتة العلاج اللي بنتي بتاخدها”.

وأشارت إلى أن طبيبة الطوارئ اكتشف أخذ الطفلة دواء خطأ قائلة: "الدكتورة بصت على الروشتة، اكتشفنا إن الصيدلية صرفت دواءً غلط، وبنتي بدل ما تاخد دواء Respidep للبرد، أخدت Risperdal"، وهو دواء مضاد للذهان.

واستكملت الام حديثها: “غلطة واحدة في صرف الدواء كانت هتاخد بنتي مني، وإحنا اتخذنا الإجراءات القانونية، ونثق إن الجهات المختصة ستحدد المسؤولية وفقًا للقانون”.

وطالبت الآباء أخذ الاحتياطات اللازمة عند شراء الأدوية قائلة: “بطلب من كل أب وأم متستلموش أي دواء وتخرجوا، اقرأوا الاسم حرف حرف، وقارنوه بالروشتة، ولو في شك حتى 1%، استفسروا”.