ميار الببلاوي تهاجم وفاء مكي: مش بريئة

علقت الإعلامية ميار الببلاوي على الانتقادات الموجهة إليها بكتمان شهادة الحق وظلم الفنانة وفاء مكي، والتسبب في حبسها.

وقالت ميار الببلاوي خلال استضافتها مع الإعلامية بسمة وهبة ببرنامج "العرافة" عبر قناتي “النهار” و"المحور" عقب أذان المغرب مباشرة، "أنا مش بكتم الشهادة، ومش ظلمت حد، وكانت الأقوال اللي حواليا متضاربة، وكانت واحدة طالعة تستغيث بتقول عايز أكل أنا وعيالي وهي صحبتي أعمل إيه".

وتابعت "القصة الحقيقية هي إن واحدة جات جابت لي شغالات وكنت طالباهم، وكنت  نازلة بسرعة رايحة فرح بنت خالتي، قلت لها أوك أخدهم والحوار كان أقل من دقيقة في مدخل العمارة، وكانت واحدة منهم نعسانة، وواحدة واقفة مضايقة، والبنت التانية كنت عايزه توريني إن شعرها محروق، فسألتها هي مالها، ردت قالت دا الأستاذة وفاء حلقت لها شعرها أصل عندها قراع، فقلت لها مش عايزاها".

وأكملت "وأنا أديت للبنت فلوس، وحاولت أساعدهم يشتغلوا عند ناس تانيين، ودا اللي حصل معرفش بقى هو فين دليل براءة وفاء في كلامي، والطب الشرعي أثبت إن البنت مش مريضة بالقرع بل تم تعذيبها واتحلق لها شعرها وأثناء الحلاقة اتحرقت، وطلبت أروح أشهد بالحق لكن قالوا شهادتك مش هتفيد بحاجة، والست دي مش بريئة".