"سلبوا روحي وسرقوا 190 ألف جنيه".. مسن يستغيث من سيدتين في بولاق الدكرور

نشر شخص منشورا عبر صفحته على “فيسبوك” اتهم فيه سيدتين بالاستيلاء على مبلغ 190 ألف جنيه من داخل مسكنه في منطقة بولاق الدكرور.

قاعد قدام بيتي والغدر جالي لحد عندي

وقال صاحب المنشور: “أنا اسمي محمود حسين حماد، ساكن في بولاق الدكرور، محافظة الجيزة وعندي 75 سنة ومريض، قاعد قدام باب بيتي في حالي وفي أمان الله في الدور الأرضي، والغدر جالي لحد عندي على إيد ناس جردوا نفسهم من أي رحمة أو إنسانية”. 

وأضاف: “وأنا قاعد قدام البيت لقيت اتنين ستات، واحدة شايلة عيل والتانية مغطية وشها بالطرحة، قالوا لي عايزين مياه ساقعة للشرب، وأنا دخلت أجيب لهم المياه من التلاجة، وبصوا لي وقالوا لي أنت شكلك تعبان يا عم الحج، تعالى إحنا نشفيك، ده فيه حد عامل لك عمل على فلوسك”.

سلبوا روحي وعقلي

وأكمل صاحب المنشور: “من اللحظة دي أنا مش عارف أنا مين ولا إيه اللي حصل فيا، كأنهم سلبوا روحي وعقلي مع بعض، بقيت زي العبد المأمور في إيديهم، بلا إرادة ولا وعي، اتحرك معاهم يمين وشمال كالميتين، ومراتي العجوزة اللي عندها 65 سنة دخلوها الحمام وأمروها ما تطلعش عشان يخلصوا جريمتهم براحتهم”.

وأكد صاحب المنشور: “بعدها أنا فقدت الوعي ولقيت نفسي بدخل أجيب 190 ألف جنيه بإيدي، دي مش مجرد فلوس دي فلوس علاجي اللي بصرف منها على مرضي، وفلوس جواز ولادي الـ4 اللي بيموتوا كل يوم عشان مش عارفين يتجوزوا ويستروا نفسهم، شقى عمري كله اتحط قدامهم وخدوه وأنا مغيب عن الدنيا ومش حاسس بحاجة”.

توهت في الشارع

وأضاف: “خلونی أمشی معاهم لحد ناصية الشارع عشان قالوا ما نعرفش الطريق، والست اللي شايلة شنطة شقى عمري كانت سابقة قدامنا والتانية جنبي، ولما مشيوا وسابوني توهت في الشارع، فوقت على كارثة هدت حيلي وكسرت ضهري”.

محضر بقسم الشرطة

وأكد صاحب المنشور، أنه تقدم ببلاغ رسمي للأجهزة الأمنية قائلًا: “انا عملت محضر في قسم شرطة بولاق الدكرور بتاريخ 9 أكتوبر، والكاميرات تم تفريغها وشافتهم، وأهل المنطقة كلهم شهود إنهم معروفين ومشهورين بأعمال الودع والنصب على الغلابة”.

واختتم صاحب المنشور، قائلًا: “انا بناشد وزير الداخلية، وكل قيادة في البلد دي اقفوا جنبي، باللە علیكم اقبضوا عليهم، رجعولي فلوسي وشقى عمري”.

اقرأ أيضًا: 

القبض على سائق ادعى سرقة 260 ألف جنيه منه في حدائق أكتوبر