"باربي الشرقية" تفتح النار على أكاديمية لتعليم الإنجليزية: "نصابين ومستفدتش حاجة"

نشرت صانعة المحتوى ندى أحمد الشهيرة باسم “باربي الشرقية”، مقطع فيديو تهاجم فيه إحدى أكاديميات تعلم اللغة الإنجليزية، وتتهمهم بالنصب والإهمال، ما أثار حالة واسعة من الجدل، خاصة وأن عدد من الذين سبق والتحقوا بالأكاديمية أكدوا مزاعمها، لافتين إلى تعرضهم لنفس المواقف.

اتجبرت أسجل في الأكاديمية 

وفي المقطع المنشور، قالت ندى إنها أُجبرت على التسجيل والالتحاق في الأكاديمية، موضحة أنها عند التسجيل وجدت أن المواعيد لا تناسبها، وفي ذات اللحظة أرادت استرداد النقود لتأجيل الحجز للشهر المقبل، إلا أن موظفة الحجوزات رفضت تسليمها النقود فاضطرت للحضور.

وفيما بعد واجهت ندى مشكلة خلال جلسات الدورة التدريبية، إذ تخلفت عن حضور عدد من المحاضرات بسبب عدم رد المسؤولين على رسائلها واستفساراتها بشأن مواعيد الحضور، وقالت: "أنا مستفدتش أي حاجة أنا حاجزة معاهم 6 مستويات ومستفدتش منهم بحاجة، أنا عايزة حقي”.

وأضافات: “أنا كل ليفل بأدخله لازم أغيب 3 محاضرات بسبب أن محدش بيرد عليا ويقولي المواعيد، إنتوا دلوقتي بتاخدوا فلوس ليه بناءً على إيه طب على الأقل أخد المستويات بتاعتي”.

واختتمت: “أنا عاملة الفيديو ده عشان مش عارفة أتواصل مع مين مفيش إدارة أتواصل معاها أنا بتعامل مع شوية عيال”.

تعليقات تهاجم الأكاديمية 

ودعمت مجموعة من الحسابات، مزاعم ندى، لافتين إلى تعرضهم للمواقف ذاتها أو مواقف مشابهة مع الأكاديمية ذاتها.

وكتب أحد الحسابات: “نفس اللي حصل معايا حجزت 6 ليفل ومستفدتش حاجة، وكنت بغيب كتير برضو وحجزت من 6 لـ 14 ومروحتش حاجة عشان المدرسين والامتحانات، وخدوا فلوسي وقولتلهم مستفدتش حاجة محدش عبرني ولا أي حاجة بجد مفيش إداره ولا تعليم ولا أي حاجة خالص ولحد دلوقتي فلوسي مرجعتش”.

وكتب حساب آخر: “أخيرًا حد اتكلم في الموضوع دا، فعلا نصااابين وأسلوب وحش، ومش بيردو على حد ومحدش ياخد عندهم عشان دا مش نظام وأنا وصحبتي أخدو فلوسنا وقالولنا ملكوش ليفيلات عندنا لو عايزين تكملوا ادفعو تاني وإحنا المفروض كنا دافعين ولسه الليفيلز مخلصتش، بس قالوا الوقت خلص المفروض الليفيلز دي كانت خلصت في وقت معين وعشان إحنا حصلت ظروف ومخلصنهاش في الوقت دا، كدا خلاص ملكمش حاجة عندنا ولا رضيوا يرجعولنا الفلوس ولا يدونا أي ليفيل، بجد شغل نصب ومستفدناش أي حاجة”.

وعلق ثالث: “كلامك صح أنا كنت حاجزة 14 ليفل وكان في كمية إهمال وكل شوية يأجلوا، وكل شوية يغيروا المدرس وكان في مشاكل كتير في أوفلاين فتحولت أونلاين، وكانت أسوأ كمان”.

وعلى الصعيد الآخر، كان هناك بعض التعليقات المساندة للأكاديمية والتي تشير إلى انضباط معلميها وإدارتها مع الطلبة والملتحقين بها، وكتب حساب عبر “تيك توك”: "أنا طالبة هناك والمعاملة معاهم كويسة ومشوفتش حاجة وحشة منهم".

رد الأكاديمية 

تواصلت “تليجراف مصر” مع الأكاديمية للحصول على تعليق أو رد على مزاعم صانعة المحتوى، ولم يتم الرد حتى لحظة نشر الخبر.

اقرأ أيضًا:

كورس رقص شرقي بضوابط شرعية.. مدربة تفتتح أكاديمية للملتزمات فقط

أسامة قابيل: تحويل التعدد إلى "كورس مدفوع" استخفاف بالدين وعقول الناس