مصطفى شعبان: "نور الشريف قالي العار قصة لا تنتهي"

كشف الفنان مصطفى شعبان، تفاصيل مكالمة الفنان الراحل نور الشريف له، بعد تقديمه مسلسل “العار”.

“العار” قصة لا تنتهى

وقال شعبان، خلال لقائه في برنامج “حبر سري”: “كلمت نور الشريف قبل ما أعمل دوره، وقالي العار قصة لا تنتهى، وعملت المسلسل وخلصت قبل رمضان بأسبوع، وسافرت لبنان، لقيت الناس بتقولي هناك يا مختار وجمل من المسلسل، ولقيت حوار لنور الشريف مكتوب فيه مصطفى شعبان أبهرني في العار، كلمته على طول، قولتله في ناس واخدة كلام على لسانك الحق شيله، قالي أنا قولت الكلام ده فعلًا، وأنت عملت الشخصية بمنظور تاني”.

اتهاجمنا قبل عرض “العار”

وأضاف “رجعت مصر على طول، وممكن أعمل العار بمنظور تاني خالص، وروميو وجوليت بتتعمل أكتر من 100 سنة، واتهاجمنا بقوة قبل عرض العمل، وملعب الدراما أخطر من السينما، والاتنين تاريخ، ولغاية النهارده فاكرين أعمال من 40 سنة، وقبل 15 سنة كانت السينما تاريخ والدراما مش أوي، الدراما بتحددها شركات الأبحاث في الإعلانات”.

وعن ردود أفعال الجمهور حول أعماله، قال شعبان “السوشيال ميديا مش تعبير حقيقي عن الشارع، وفي كام صحفة ممكن أدفعلها تقول إني أعظم حد في الدنيا، وبنقيس على الشارع الحقيقي”.

فيلم جديد

وعن فترة ابتعاده عن السينما، قال “مكنش في أعمال ترضيني، وعندي فيلم السنة ديه، وبنحضر جزء كبير منه، وهناخد معاد طرحه الشهر الجاي، والمخرج روسي مصري، ومعانا بطل واحد أجنبي، ولازم الشخصية يبقى أجنبي، وفي ممثلين كتير مصريين، ومش بفكر مين هينزل قدامي في السينما، لو الفيلم بتاعي حلو هينزل في أي وقت”.