صبري عبد المنعم: شوفت العذراء والنبي محمد بعيني

كشف الفنان القدير صبري عبد المنعم خلال برنامج "كلم ربنا"، الذي يقدمه الصحفي أحمد الخطيب، عبر إذاعة راديو "9090"، علاقته الوثيقة بالله -عز وجل-، وحقيقة الرؤى التي يراها بين الحين والآخر، وصدق رؤيته للنبي -صلي الله عليه وسلم-.

وقال عبد المنعم، "حقيقي شفت العذرا وكلمتها وكلمتني، وكمان شفت رُسل وأنبياء وصالحين بعيني الاثنين، وكانت أجمل رؤية رؤية حضرة سيدنا النبي وفرحت كتير جدا الحمد لله، ولما رحت له المدينة وزرت الكعبة الشريفة العظيمة، شاهدت العديد من النور والكرامات والنفحات التي تسعد أي إنسان في الدنيا".  

وأضاف "أكتر موقف كلمت فيه ربنا بقوة وناجيته بالدموع الكتيرة لما أبويا أصر عليا وخلاني ادخل ثانوي فني، وأنا كنت عاوز ادخل ثانوي عام، واحقق هدفي، و علشان أروح معهد فنون مسرحية، ويشاء ربنا السميع العليم إني وأنا داخل المدرسة الثانوية الميكانيكية أشوف قاعة اسمها المسرح المدرسي، وبيجيبوا لنا أساتذة كبار وخريجين من معهد الفنون المسرحية، وكل دا علشان يدربونا ويعلمونا مسرح كويس، والحمد لله ربنا رضاني، وأوجد لي الشيء اللي أنا بحبه في المكان اللي مكنتش عاوز أروحه عمري، وبعدها ذاكرت ثانوية عامة علشان ادخل المعهد، ووقتها بكيت بكاء بحرقة وما زلت بقول في كل دعاء لربنا وبعد كل صلاة، علمك بحالي يُغني عن سؤالي".