بسمة وهبة لـ ميار الببلاوي: مضايقة من برنامجي؟.. لا تقربوا الصلاة

علقت الإعلامية بسمة وهبة، على الجدل المثار حول حلقة الإعلامية ميار الببلاوي، في برنامج “العرافة”، التي تم عرضها في الموسم الرمضاني الماضي 2024.

فضايح في سبيل التريند

وقالت بسمة وهبة خلال مقطع فيديو نشرته عبر حسابها الرسمي على موقع التواصل الاجتماعي “فيس بوك”، “عمري الحقيقة ما رديت على حد حتى لو كلامه كدب وده بيحصل كتير أوي، في العرافة ناس كتير تكون طلعت وحلقاتها تكون معملتش تريند أو عملت تريند وعايزين تاني، فبيتقولوا حاجات لنفسهم ويعملوا فضايح لنفسهم في سبيل التريند”.

اطلعي كذبيني

وتابعت بسمة وهبة "أنا بطنش وأقول خليهم ياكلوا عيش، فيه كلام اتسرعتي وقلتي والنبي يا بسمة شيليه، وقلت لك من العين دي، وشيلت اللي طلبتيه، اطلعي كذبيني، لا تقربوا الصلاة، ساكتة ليه من يوم ما الحلقة اتعرضت ما دام مضايقة."

بسمة وهبة

واستكملت بسمة وهبة حديثها خلال مقطع الفيديو "مبحبش اللي بيجي على الولايا، الشيخ وصل بيه الأمر أنه يوصفك بالزنا، بحب الأزهر ورجال الدين، ومبحبش حد يجي جنب شعرة منهم، دا مش نفس نهج سيدنا النبي أبدا، ولا دي طريقته، مينفعش الكلام اللي قلته دا بيتعارض مع الخطاب الديني، هاتلي 3 شهود غيرك يؤكدوا حكم الزنا".

رد ميار الببلاوي

وكانت ميار الببلاوي ردت على الهجوم الذي تعرضت له في الفترة الأخيرة، من قبل أحد الشيوخ، عقب ظهورها مع الإعلامية بسمة وهبة.

وكتبت الببلاوي، عبر حسابها الرسمي بموقع التواصل الاجتماعي “فيس بوك": “كل الناس عمالة تقولي غلطتك إني طلعتي في برنامج بسمة طيب أقسم بالله ما كنت أعرف أنها هتكون هجومية كده”.

وأضافت "اتلجمت مكنتش عارفة أرد خالص وكل اللي كان في دماغي إني ألغي الحلقة وليس كل منطوق مقصود".

مطلقتش 11 مرة

وتابعت "أنا مطلقتش 11 مرة، كان قصدي أن جوزي على طول بيقول عليا الطلاق يا جماعة دا بتاع البطيخ بيحلف يمين طلاق أن البطيخة حمرا يبقى مراته طالق؟ الناس ماسكة على كلمة واحدة تستاهلي علشان طلعتي مع بسمه خلاص ارحموني".

اعترفت بغلطتي

وأردفت "اعترفت بغلطتي بس أنا صحبتى دعتني لبرنامجها وأنا بحب بسمة ومن زمان وصورنا قبل رمضان بأسبوعين وأنا أقسم بالله عمري مشفت برنامج العرافة دا قبل كده اللهم حلقة شاكوش ومراته، وعارفة بسمة طيبة وبتحبني فوجئت بالكاركتر اللي كانت متقمصاه في البرنامج كان كل همي أحافظ على هدوئي واحترامي للمكان وأرد على أي سؤال بصراحة علشان المصداقية".

وجع قلب

واستكملت “أنا كنت ضيفة في برنامج متشاف مع مذيعة كبيرة على قناتين كبار النهار والمحور، وأنا الفلوس فأنا أخدت مبلغ لا يذكر وكنت مصممه أرجعه وألغي الحلقةـ وأسالوا أستاذ شريف رئيس تحرير البرنامج أرجوكم كفاية نقد واللي حصل فى الفيديو الناس اللي بتقول تمثيل ربنا يحسسكم بالقهرةـ وبوجع قلب الشريفة الحرة المتقية ربها لما يتقال عليها زانية من شيخ”.

خط أحمر

واختتمت "حياتي الشخصية خط أحمر ودا هيكون شرطي أنا خدت كل الأدوية بس والله من النكد ما قادرة أنام، وكمان بدأنا الإجراءات القانونية سمعت إنه مسح الفيديو بس خلاص شوفناه والمستشار القانوني بدأ شغله وحسبي الله ونعم الوكيل وبعتذر على عدم الرد على السادة الصحفيين لأنه لم يعد لدي ما أقوله، والأمر ترك للقانون والقضاء المصري الشامخ وعند الله تجتمع الخصوم".