سيناريو حبيبة الشماع يتكرر.. فتاة تتهم سائق "إندرايف" بمحاولة خطفها

روت فتاة تدعى جنى الحاوي، تفاصيل تعرضها لمحاولة خطف من قبل سائق في شركة النقل الذكي، “إن درايف”، بعدما صمم على تقاضي ما يزيد عن ثلاثة أضعاف المبلغ الذي حدده التطبيق للرحلة.

وقالت الفتاة، في تغريدة لها عبر صفحتها على موقع “إكس": “أنا لحد دلوقتي مش عارفة اتخطي اللي حصل معايا وقلبي مقبوض رعب، طلبت إن درايف لحد مول 1 الرحاب وبيني وبينه 10 دقايق بالظبط والأجرة اللى موافق عليها ومكتوبة 55 فضل يلف جوه الرحاب ولما وصلت بيقولي حسابك 180+20 تكييف!! بقول له: دي اللى على الابلكيشن؟ ازاي يعني؟ فرفع صوته”.

سرعة مجنونة

وأضافت: “وبيقول لي: مش هتنزلي من العربية غير لما تدفعي، بقول له: إنت أهبل؟ هتخطفني يعني؟ ده القسم جنبنا؟ رد عليّ: قسم آه، وقفل اللوك، وطلع يجري بسرعة مجنونة، وفضلت أزعق وأخبط في الباب، وفضلت أخبط على الشباك، راح فتح اللوك، فتحت العربية وهي بتتحرك، وفضلت أصوت: حد يلحقني، فوقف العربية ونزلت أجري، نزل ورايا”.

وتابعت: “لقيت واحد وقف لي بعربية، فالكابتن بيقول له: أنا ليّ فلوس، وأنا مرعوبة ومش فاهمة، طلعت اللي في شنطتي رميته في الأرض، كان 300 جنيه، الشاب اللي معايا قال لي صوّريه، ولسه بصوّره راح جري في العربية. عملت له محضر، ولسه مايعرفش اللي هيحصل له، ربنا ينتقم منه يا رب”.

هروب السائق

واستكملت: "والله العظيم أنا لحد دلوقتي بتشاهد ومش عارفة أتلم على أعصابي، مكملتش ربع ساعة واتعمل له محضر، وهندمه على اليوم اللى فكر يعمل كده، وهيبقي عبرة، بس والله والله كل ده مش هيشفي غليلي ولا يساوي لحظة رعب عشتها".

“كنت هنط من العربية”، هكذا تابعت الفتاة مؤكدة رغبتها في تكرار سيناريو “فتاة الشروق”، قائلة: “هو ده الطبيعي يا جماعة؟ هما السواقين ضامنين أن مفيش حساب بالقانون فمش خايفين! أنا معرفش هو شارب ولا طافح ايه بس  لو فضل ماشي كنت هنط من العربية عادي، أصل هعمل ايه ف واحد مجنون؟ أنا معرفش ممكن يعمل فيّ إيه؟ أنا اعترضت علي كلمة مش هتنزلي من العربية، وإنه قفل اللوك”.