فريدة سيف النصر: مغلطتش في اللاجئين واللي يجي بلدنا يحترم عاداتنا

قالت فريدة سيف النصر، أنها لم تحدد هوية اللاجئين الذين تضررت منهم، ولم تقل أن جنسيتهم سودانية.

وأضافت فريدة سيف النصر في تصريحات لـ"تليجراف مصر" أرحب بكل ضيف في بلدنا الحبيب مصر، أحترم كل من يحترم شعبها وعادات أهلها".

اللاجئين السوريين بتوع شغل

وأشادت فريدة سيف النصر، باللاجئين السوريين، قائلة “بتوع شغل وناش شقيانة ونجحت في البلد ورفعت من استثماراتها، مسببتش إزعاج لحد ولا ارتفاع أسعار وعاداتنا وعاداتهم واحدة، ولازم كل لاجئ يكون بنفس العقلية”.

تفاصيل الواقعة

وكشفت فريدة سيف النصر تفاصيل واقعة تضررها من مجموعة من اللاجئين بمحيط سكنها قائلة “كانت الساعة بعد منتصف الليل، وكان فيه مجموعة من الشباب بيلعبوا ماتش في الشارع بطوب وهرجلة، والصوت واصل لآخر المهندسين ومكنتش أول مرة تحصل لكن اليوم ده اللي زاد إنهم اتخانقوا بعنف وقلعوا هدومهم ومسكوا واحد مصري هجموا عليه وضربوه ضرب مبرح، ومجموعة أخرى تدخلت لحل المشكلة”.

وتابعت قائلة “لقيت جيراني بيستنجدوا بيا، وكل الناس بقت خايفة الحي راق وإحنا مش واخدين على كل ده، وأول مرة نشوف الحاجات دي من ساعة ما هما جم، اضطريت أبلغ الشرطة لفض الاشتباك، واستجابت الأخيرة على الفور، مش بس  لأني شخصية مشهورة، ده كان فيه أكتر من بلاغ، لكن عشان اسمي معروف الموضوع اتعرف، وده ضايقني لأنهم كده ممكن يستقصدوني، ويستنوني عند بيتي، وكده أنا مش في أمان”.

فريدة سيف النصر: أنا مش ضد حد 

واستكملت فريدة سيف النصر حديثها قائلة “أنا لقيت المواقع بتهاجمني إني بغلط في اللاجئين، أولا أنا مغلطتش في حد أنا اتصرفت بشكل طبيعي، ومكتبش على صفحتي غير لما كل الناس قالت إني عملت محضر".

وتابعت "أنا اتصرفت كفريدة الانسانة البسيطة أن فيه تعدي بيحصل تحت بيتها فاتصرفت حماية ليا ولجيراني، لكن اللي اتكتب من بعض المواقع، ده ميصحش أولا أنا مقولتش سودانيين، ومحددتش أي جنسية وأي حد مرحب بيه بس يحترم عاداتنا وتقاليدنا ويحترم المكان اللي فيه، وطالما معاهم فلوس يروحوا يودوا عيالهم نوادي لكن هرجلة بالشكل ده بعد نص الليل ولعب كورة وطوب وخناقة، الناس خافت على عربياتها و مش واخدين على الخناقات دي”.

وأوضحت فريدة سيف النصر "فيه كمان مجموعة من جنسيات مختلفة فاتحين بيوت دعارة في منطقة المهندسين وكباريهات وده أمر مش مقبول ولازم الدولة تتدخل وتوقف كل ده، بلدنا مينفعش يحصل فيها كده، واللي يجي بلدنا لازم يحترم عاداتنا وتقاليدنا".

يذكر أن الفنانة فريدة سيف النصر، تصدرت مواقع التواصل الاجتماعي وقائمة الأكثر بحثًا على “جوجل”، بعد تحريرها محضرًا ضد بعض اللاجئين بعد شجارهم أمام منزلها في منطقة المهندسين.