"شات" كشف علاقة خفية.. اعترافات المتهمة بقتل شقيقها بالتجمع (خاص)

حصل “تليجراف مصر” على تفاصيل التحقيقات في واقعة مقتل شاب بطعنة في الصدر بسلاح أبيض “سكين” بمنطقة التجمع الأول بالقاهرة على يد شقيقته بسبب شكه في سلوكها ومنعها من الذهاب إلى الجامعة.

التحقيقات في قضية مقتل شاب على يد شقيقته بالتجمع

وبحسب أقوال المتهمة أمام جهات التحقيق “اللي حصل إن من شهرين كان فيه مشكلة وخلاف بيني وبين شقيقي المتوفي بسبب أنه عرف أني بكلم واحد صاحبي ومرتبطة بيه وشاف محادثات ما بيني وبينه وخد التليفون بتاعي وكسره وحرمني من النزول فترة وحبسني في البيت هو وبابا تقريبا 3 شهور”.

وتابعت المتهمة في أقوالها “بعدها قدرت اتصرف وأجيب تليفون وكنت بستخدمه من وراهم وبعدها سافرت الفيوم مع واحدة صاحبتي، وقابلت الولد اللي أنا مرتبطة بيه هناك، ورجعت بليل وكنت في غرفتي وماسكة التليفون وفجأة لقيت أخويا داخل الغرفة وشاف التليفون معايا وسحبه مني واتخانق معايا وحلف أن مفيش نزول من باب الشقة تاني ولا جامعة لغاية ما تموتي وطلب مني افتح الباسورد وأنا مرضتش”.

وقالت “لو فتح الموبيل كان هيعرف كل حاجة بيني وبين الشخص اللي مرتبطة بيه وهيعرف أني كنت مسافرة الفيوم معاه، بس قال لي أنا بكره الصبح هفتحه بمعرفتي في أي محل تليفونات وبعد كده دخل أوضته وشوية ورجع لي تاني وقالي نفس الكلام، بعد كده أنا نمت شوية”.

واستكملت اعترافاتها قائلة “صحيت على الساعة 7 الصبح وكان البيت كله نايم وقلت لنفسي أنا لازم ألحق أعمل أي حاجة قبل ما اتفضح وأخويا يصحى يقول للبيت كله والموضوع يكبر، ففكرت أني اتخلص منه وبالفعل دخلت المطبخ وجبت سكينة وفضلت مترددة أدخل عليه الأوضة وهو نايم وأخرج تاني وأدخل لحد ما قولت لنفسي أنا لازم أخلص منه عشان الموضوع يموت معاه”.

وتابعت في أقوالها “ضربته بالسكينة في صدره ضربة واحدة وبعد كده قام فجأة وفضل يقول الحقوني الحقوني وشال السكينة من صدره ورماها على الأرض وأنا اتخضيت من المنظر وصرخت وبابا صحي على صوتنا وحاول يكلم الإسعاف عشان تيجي وأنا خدت السكينة وغسلتها في حوض الحمام ودخلت المطبخ وحطيتها على الطاسة متوسخة في الحوض، وبعدين أنا قولت لبابا إني كنت نايمة وصحيت على صوت أخويا، وهو بيقول إلحقوني إلحقوني والإسعاف جت خدته وعرفت إنه توفي، ولما الشرطة جت سألتني اعترفت بكل حاجة واتقبض عليا”.

المحامي مينا ناجي يكشف تفاصيل جديدة 

من جانبه كشف مينا ناجي محامي المتهمة عن تفاصيل جديدة في الواقعة التي تنظر أمام الدائرة 13 جنايات التجمع الأول بأنها تعاني من مرض نفسي، وقدم مستندات تثبت ذلك.

وطالب ناجي، بعرض المتهمة على طبيب نفسي لتقييم حالتها، وبناءً على ذلك، قررت المحكمة تأجيل نظر الجلسة إلى الأول من يوليو المقبل لانتظار تقرير مفصل عن حالتها.