"قلبه اتكسر من الضغوطات".. استشاري يحلل الحالة النفسية لـ أحمد رفعت

ما زالت أسباب وفاة لاعب فريق مودرن سبورت والمنتخب المصري أحمد رفعت حديث الشارع، وسط اتهامات لمسؤولين رياضيين بظلمه، ما تسبب في قهره وموته في النهاية، وهو ما يبرز أن الأزمة الصحية التي توفي على إثرها ارتبطت بحالته النفسية، لذا تحدث “تليجراف مصر” مع استشاري نفسي لتحليل الأمر.

اضطرابات نفسية

يقول استشاري الصحة النفسية، الدكتور وليد الهندي، إن الضغط النفسي هو أحد الاضطرابات النفسية الأكثر شيوعَا بجانب القلق والمخاوف المرضية، ودائمًا يصيب الإنسان بسبب الحالة الناتجة عن عدم التوازن بين مطالب الشخص وقدرته على تحقيق الاستجابة".

أزمة أحمد رفعت

وعن حالة أحمد رفعت، قال “يعني هو عايز يبقى أحسن لاعب في العالم مش عارف يحقق ده، الناس بتنال منه وحياته مش منظمة بيبقى فيه مجموعة من الأفكار الهدامة، ومجموعة من الضغوط العصبية ده خلاه مضغوط، واتولد عنده الضغط النفسي الداخلي اللي أكيد بينعكس على السلوكيات”.

وتابع: "الضغط دايمًا يُحدث تغيرات في الانسان،  تغيرات فسيولوجية ومعرفية وسلوكية وبينتج عنه مشاكل داخلية، بتخلي الإنسان مش عارف ينجز ولا عارف يوصل لتحقيق مداركه، أو لأداء العمل بتاعه في فترات متوازنة وطويلة الأمد، ليه؟، لأنه بينتج عنه القلق  يعني بيبقى عنده دايمًا متلازمة القلق، الاجهاد الذهني، التوتر، الانشغال العقلي".

الضغط النفسي

وأضاف:" كان عنده هدف عايز يحققه طول الوقت شايفه وشايف كلام الناس الضاغط عليه، واللي بينعكس عليه في انخفاض نسبة التركيز، والقدرة على اتخاذ القرارات المناسبة، و بيديه شعور بالانزعاج، إلى جانب عدم الأريحية النفسية".
وتابع:" يعني الضغط دا فعلًا مشكلة بيخلي الانسان شايفينه مش هو، حاسينه إنه مكبل أو عليه مجموعة من الأعباء".

متلازمة القلب المنكسر

واستكمل الهندي حديثه قائلًا:" لما الضغط بيتزايد، والحزن بيتزايد، دا بيتسبب في ضعف في كفاءة الجهاز المناعي، والإصابة بأمراض عديدة جدًا، فبحسب دراسة عن الحزن الشديد، قالوا الإنسان اللي بيتكسر قلبه أو بيتقهر، بيتعرض لخطر الوفاة أكتر من أقرانه بنسبة 21 مرة".

وأضاف:" عندنا متلازمة القلب المنكسر، وهي لما الإنسان بيتكسر قلبه بيجيله نفس أعراض الذبحة الصدرية، ويبدأ البطين يوجعه، وتعرق شديد جدًا، وريقه ينشف ويجيله زغللة، وعدم اتزان، وممكن يقع ولو ملحقتهوش ممكن يجيله جلطة، ولقينا إن السكتة الدماغية بتحصل أكتر للإنسان لما يتعرض للحزن، السكتة الدماغية والسكتة القلبية، وأخفها السكر والضغط تخيل شدة الحزن ممكن تعمل ايه؟".