شيرين: ويجز حبيبي.. ومحمود الليثي هيجيلي البيت وهعمله أحلى أكل

وجهت الفنانة شيرين عبدالوهاب الشكر لكل من هنأها بعيد ميلادها، في رسالة صوتية مؤثرة نشرتها عبر حساباتها الرسمية بمواقع التواصل الرسمية الخاصة بها، معبرة عن امتنانها العميق لدعمهم وحبهم خلال هذه الفترة.

تضمنت رسالة شيرين قائمة طويلة من الأسماء التي توجهت إليها بالشكر والتقدير، بدءًا من أصدقائها المقربين وزملائها الفنانين وحتى جمهورها في الوطن العربي الذي أشاد بنجاحاتها الأخيرة واستعادتها لرشاقتها بعد فقدانها الكثير من وزنها وزيادة ثقتها بنفسها وعودتها إلى الظهور بشكل أكثر إشراقًا وجاذبية، وعودتها من جديد إلى الساحة الفنية وهي أكثر نضجًا وحكمة، ولاقت هذه الرسالة تفاعلًا واسعًا على مواقع التواصل الاجتماعي.

رسالة شيرين

وقالت النجمة شيرين في رسالتها عبر حسابها الرسمي على موقع “انستجرام”: "عايزة أشكر كل الناس اللي عايدتني اللي هما عائلتي الكبيرة اللي عايدتني بمناسبة عيد  ميلادي وأثروا فيا جدًا جدًا السنة دي، معايدة المطربة سميرة سعيد النجمة الكبيرة الديفا صديقتي الغالية، ومها صاحبتي مش هنسى أبدًا جمال الفويس بتاعكم وجمال المعايدة بتاعتكم".

وتابعت: "شكرًا ربنا يخليكم ليا حبايب قلبي بخاف عليكم أكتر من أي حاجة، أستاذ بهاء الدين محمد وأستاذ وائل جسار وأستاذة لميس الحديدي وويجز حبيبي، ووائل جسار نجم كبير جدًا جدًا وعزيز على قلبي وأخويا وبقوله ربنا يكون في عنكم وتشوفوا لبنان كلها خضرة ومتعمرة، ونرجع تاني ضيوفكم زي ما كنا بنروح وبتشيلونا من على الأرض شيل، يا رب يكون مع لبنان يا رب". 

ويجز ولميس الحديدي

وأضافت: "وطبعًا الإعلامية الكبيرة لميس الحديدي، حبيبتي وأستاذتي وحبيبة قلبي، والمطرب ويجز يا روح قلبي شكرًا.. شكرًا على معايدتك الجميلة الرقيقة.. أنت رقيق وحساس وشكرًا يا حبيبي قوي، وبالنسبة للملحنين أستاذنا بقى عزيز الشافعي حبيبي وصديقي هو وتامر حسين وتوما دول ليهم معزة خاصة في قلبي دول ساعدوني وبنوني من جديد عايز أقول لهم إن أنا نجاحي ده أهديه لكم عشان أنتم شركاء فيه وأنا مبسوطة أوي أوي إن أنا بقى ليا صحاب زيكم، ناس نضاف وفنانين حقيقيين ربنا يخليكوا ليا". 

محمود الليثي

واستطردت: "محمود الليثي مش عارف أقول لك إيه؛ هتجيلي البيت وهنقعد وأعمل لك أكل ونضحك ونهزر وأنت غالي عندي أوي وغنوتك الجديدة ما ببطلش اسمع فيها (يا عم المجال كله) شكرا يا حبيب قلبي شكرا على طيبتك ولسانك الحلو، أنت خيرك عليا يا ليثي حبيبي، أنا مش هنسى وقفتك معايا في فرح أختي، تسلم لي يا حبيبي شكرًا.. وكل سنة وأنت بخير وكل سنة وأنت ناجح".

كما وجهت رسائل أخرى لبعض أصدقائها قائلة: "خالد سليم النجم الكبير ألف شكر حبيبي، وصديق غالي شكرًا يا حبيبي على معايدتك، وكل سنة وأنت حبيبي طيب وفي بيتك سالم غانم أنت وأهل بيتك، هايدي موسى حبيبة قلبي، شكرا يا أجمل صوت، وشكرًا على قلبك وإحساسك الحلو، وكمان مش عايزة أنسى كلام المطربة ساندي، حبيبتي شكرًا، لأنها قالت كلام حلو في حقي.

وأضافت شيرين: شكرا جدا، تامر عبد المنعم متعهد الحفلات الكبير، صديق غالي من زمان.. شكرا يا حبيبي ودائمًا موفق في شغلك، وسارة صاحبتي شكرًا حبيبة قلبي على معايدتك الجميلة.. وحسن أبو الروس طبعا شكرًا يا لذيذ يا رايق شكرا على كلامك الحلو.. أنا مش عارفة أجاريك طبعا في لسانك  الحلو والحاجات اللي أنت قلتها دي عني بجد ألف شكر".

واختتمت رسالتها قائلة: "شكرًا لكل إنسان عايدني في عيد ميلاد السنة دي لأنه كان فارق معايا السنة دي أن أنا اسمع صوته واسمع معايدته ليا قويتني وفرحتني وحسستني إن العيد السنة دي يعني غير كل سنة، ربنا يخليكوا ليا ويخليلي كل الفانز، ألف شكر ليكم يا حبايبي.. كل سنة وأنتم عيدي".