جمال فرويز عن المذيعة آلاء عبدالعزيز: "في حاجة غلط"

علق استشاري الأمراض النفسية والعصبية، الدكتور جمال فرويز، على مرض انفصام الشخصية الذي تقول المذيعة آلاء عبد العزيز، إنها مصابة به، نافيًا معرفة المريض النفسي بإصابته بالانفصام.

مرض انفصام الشخصية

وقال الدكتور جمال فرويز لـ“تليجراف مصر”: “لا طبعًا مريض الانفصام بيبقى شايف نفسه طبيعي وشايف الأصوات اللي بيسمعها إنها أصوات طبيعية وأحاسيسه كلها طبيعية بالنسبة له هو، ما هو لو عارف إنها مش طبيعية كان طلب العلاج.. لأن ده بيبقى عنده حاجة اسمها فقدان الاستبصار بوجود المرض علشان كده بنسميه مرض عقلي”.

ازدواجية الشخصية

وتابع فرويز: “لو أنا مريض انفصام وبقول على نفسي كده يبقى في حاجة غلط، يمكن قصدها حاجة تانية لأن في حاجة تاني اسمها ازدواجية الشخصية ودي حاجة غير الانفصام خالص دي لما بتيجي للشخص اللي بيتعرض لضغوط إنما انفصام الشخصية ده مرض عقلي”.

آلاء عبد العزيز ومرض الانفصام

وظهرت الإعلامية آلاء عبد العزيز، عبر بث مباشر على حسابها الشخصي على “فيسبوك”، في حالة انهيار بسبب مرض أصابها.

وبدموع منهمرة قالت آلاء عبد العزيز في البث: “إنتوا عارفين أنا مين وعارفين بوست مرضي، أنا آلاء عبد العزيز المذيعة الدينية الداعية الإسلامية.. أنا نمت صحيت لقيت نفسي قلعت الطرحة وبنزل بليل وبقيت واحدة تانية.. أنا مش فاكرة إني عندي بنت وبصحى الصبح مش فاكرة بنتي”.

أنا الأصل

وتابعت: “عايزة حد يلحقني ويتبنى حالتي.. أنا لي لي مش آلاء.. أنا الأصل أنا المُزة.. مذيعة دينية مين، أنا الأصل يا حلوين، ولا هخف ولا نيلة، أنا اللي جاية”.

ما هو مرض آلاء عبد العزيز؟

ونشرت آلاء عبد العزيز مجموعة من الصور وهي مرتدية الحجاب وأخرى بدونه وأرفقتها بصور للفنانة سعاد حسني من فيلم “بئر الحرمان”.

وقالت: “جماعة أنا عاوزة أعترف لكم اعتراف، أنا مريضة بجد أنا مريضة حاليًا عندي حالة انفصام في الشخصية وانتكاسة ونوبة هوس.. دي مش أنا دلوقتي أنا آلاء عبد العزيز إلى بتتكلم معاكم التانية دي مش أنا.. أنا مش فاهمة حاجة ولازم أتعالج.. أنا بتدمر.. الشخصيه دي بتدمرني”.