"هو حر".. نقاد يدافعون عن عمرو سلامة بعد انتقاد إسماعيل ياسين

علّق الناقدان طارق الشناوي وعصام زكريا على رأي المخرج عمرو سلامة بأن الفنان الراحل إسماعيل ياسين من أسوأ الممثلين في السينما المصرية.

طارق الشناوي: من حقه يقول رأيه

وقال طارق الشناوي لـ “تليجراف مصر”: “أنا مش عايز كل واحد يقول رأيه نعتبرها معركة وتحقيق وإزاي يقول كده، دي مسألة غريبة، كل واحد من حقه يقول رأيه ومش معني إني موافق على الآراء يبقى أنا مش بحب إسماعيل ياسين”.

وأضاف الشناوي: “أنا ليا وجهة نظر إيجابية جدًا في إسماعيل ياسين، إنما مقدرش أهاجم حد لا يضحكه إسماعيل ياسين، وفيه ناس فعلا إسماعيل ياسين مش بيضحكها، وأنا رأيي إننا مزوديش ردود الفعل أمام الناس”.

واختتم طارق الشناوي: “أنا من جمهور إسماعيل ياسين لكن مغضبش من رأيه وقبل كده عمر الشريف قال نفس المعنى، بل بالعكس ده اتهم الشعب المصري بإنه عنده تخلف لما بيضحك على إسماعيل ياسين يعني اللي عمله عمرو سلامة أقل من اللي عمله عمر الشريف”.

عصام زكريا: هو حر.. وفي ناس مش بتطيق تسمع أم كلثوم

واتفق معه في الرأي الناقد عصام زكريا، إذ قال: “دي آراء وكل واحد من حقه إنه يقول رأيه ولازم يبقى عندنا تجاوز إن أي حد يقول رأيه هو حر يعني أنا فيلم المومياء من أفضل الأفلام ليا إنما ناس تانية معجبهاش الفيلم ده وده بينطبق على كل الفنون اللي في الدنيا”.

وتابع زكريا: “أنا ليا أصدقاء مش بتطيق تسمع أم كلثوم، هما حرين، مش علشان بحبها أنتقد غيري علشان مبيحبهاش، وكلنا لينا قعدتنا الخاصة مع صحابنا اللي أكيد بنقول فيها أنا مبحبش الفنان فلان الفلاني ده عادي كل واحد وذوقه”.

وحل عمرو سلامة ضيفًا في بودكاست “ليك لوك” الذي يقدمه الفنان عمر متولي عبر "يوتيوب"، ووجه له متولي سؤالًا: “من هو أسوأ ممثل في تاريخ السينما المصرية”، ليرد عليه سلامة: “إسماعيل ياسين”، فكانت تلك الإجابة مثيرة للجدل لمحبي الفنان الراحل الذي أمتعهم بأفلامه وحركاته الكوميدية التي أضحكتهم على مر السنين وما زالت حتى الآن يشاهدونها وكأنها تُعرض لأول مرة.