حالتها الصحية خطيرة.. طبيبة تتهم زوجها بخطف ابنتها من داخل مستشفى

في واقعة مؤلمة تهز المشاعر، روت طبيبة أسنان تفاصيل مأساوية عن اختطاف ابنتها المريضة التي كانت محتجزة داخل مستشفى أبو الريش، وزعمت أن والد الصغيرة هو المتهم الأول، وأنه ارتكب فعلته رغم خطورة حالتها الصحية التي بقيت على إثرها في قسم الرعاية القلبية الحرجة لشهر كامل.

الأم، التي لم تتوقف يومًا عن طرق أبواب القانون والرحمة، خرجت تناشد القلوب الحية قبل الجهات الرسمية، لإنقاذ صغيرتها التي تواجه الموت خارج أسوار المستشفى.

"دي مش أول مرة"

في تصريحاتها لـ"تليجراف مصر"، قالت الطبيبة نهال صالح والدة الصغيرة عهد إبراهيم الدسوقي: “دي مش أول مرة زوجي يعمل كده، مشاكلنا بدأت من أول شهر أبريل، لما خد البنت مني عنوة، وقدرت أرجعها من خلال محضر في قسم الشرطة اسمه ”تسليم صغير".

وتابعت: "قبل كده كمان ضربني وهددني وخلاني أمضي على ورق تنازل عنها، لكن أنا لجأت للقضاء واسترديتها بحكم محكمة، ولما استلمتها لقيتها تعبانة جدًا، وعندها مشاكل خطيرة في القلب، وارتفاع ضغط الشريان الرئوي، واحتقان شديد في الرئة، وكمان فيروس في الدم".

"استغل انشغالي وخطفها"

وأضافت الأم: “من ساعة ما رجعت لي وهي محجوزة في العناية المركزة بأبو الريش، عمري ما منعته يزورها، وراعيت ربنا فيه، وكان مكتوب لها خروج عشان نستكمل علاجها بره، ولما كنت بخلص إجراءات الخروج مع أمن المستشفى، استغل اللحظة اللي كنت بسلم فيها الورق، وأخد البنت مني ومشي بيها من غير ما أعرف”.

واستكملت: “رنيت عليه قعد يتحجج ويقول حاضر هاجيبها كمان شوية، وضابط النجدة قال له البنت فين رد شوية كدا وهجيبها ومجابهاش”.

وتابعت الأم المكلومة: "فضلت أصرخ وأستغيث بالأمن في المستشفى، لكن محدش عمل حاجة، وأنا ماليش أي حول ولا قوة".

"حياة بنتي في خطر"

وواصلت: "بنتي المريضة دلوقتي بعيد عن حضني، وفي وضع صحي ما يستحملش أي إهمال، حياتها كلها في خطر، أنا بناشد كل إنسان عنده قلب، وكل جهة مسؤولة، تقف معايا علشان أسترد بنتي قبل ما تحصل الكارثة".

محضر رسمي

واختتمت الأم حديثها بقولها: “عملت محضر رسمي بالواقعة وفي انتظار التحقيقات”.