أول رد من أسرة المتهم بخطف فتاة الشروق: "سبراي" بعشرة جنيه مش مخدر

قالت "هبة هاشم" شقيقة محمود هاشم المتهم بخطف "فتاة الشروق"، إن شقيقها برئ من تهمة الخطف، موضحة : “أخويا برئ من كل اللي بيتقال، وغلطته الوحيدة إنه مشي لما رمت نفسها من العربية”.

وأكدت "هبة" لـ"تليجراف مصر"، أن شقيقها هاتفها بعد الحادثة فورا وروى لها تفاصيل ما حدث مع الفتاة، منذ طلبها الرحلة حتى ألقت بنفسها من السيارة وهو يسير على سرعة ١٠٠ كيلو".

وقالت “أخويا شغال سواق عند دكتور كبير، بس بيشتغل ”أوبر" علشان يزود دخله وهو مروح، يوم الحادثة شغل "أوبر" البنت طلبت الرحلة وافق، وهي راكبة الجو كان سقعة قفل الشباك شويه، حس بريحة سجاير في هدومه، رش سبراي على نفسه وفي الجو، بسرعة لقى البنت رمت نفسها من العربية".

وضافت "أخويا اتصدم من اللي حصل، العربيات بدأت تتلم والناس، خاف وجري، واتصل بيا حكالي اللي حصل، قولتله ارجع شوفها قالي لا مش هلحق ومرعوب، قولتله يلغي الرحلة، ويكلم الشركة يعرفهم اللي حصل، والشركة ردت قالت جاري التحقيق".

وتابعت "إزازة إسكيب بعشرة جنيه، وتم إثبات إنها مش مخدر، أخويا لو نيته وحشة كان قفل المسوجر، لكن هو معملش أي حاجة خالص، هو خاف وروح، ومنزلش شغله تاني يوم، وفضل قاعد مع عياله، وكلام أهل الفتاة غير مقنع".

وأكملت "امبارح كان بجيب عياله من المدرسة، والشرطة جت بعدها وقبضت عليه، ومشي معاهم بالعربية والضابط ركب معاه، أخويا مش وحش ومحترم عنده  34 سنة، وعنده 3 أطفال بيحاول يربيهم كويس".

وتابعت "أخويا مش سوابق، كل ما في الأمر أنه وهو طفل يبلغ 17 سنة، في أحد أيام العيد كان يجلس أمام البحر، ويشرب سيجارة بها حشيش، الضابط عمله محضر تعاطي وخرج منها براءة لأنه طفل وصغير، لكن مش سوابق، وشغال على عربيته الخاصة، وبيدفع أقساطها".

واختتمت "غلطت أخويا الوحيدة أنه موقفش لما البنت رمت نفسها، بس ده من الخوف، أخويا بقالو ٦ سنوات في أوبر مافيش أي شكوى اتقدمت في، البنت حلفت من غير ما يحصل حاجة"، -وتمنت الشفاء للفتاة-.