سفره للعمل فغدر به.. مصري يلقى حتفه على يد صديقه بتركيا

شهدت ولاية هاتاي التركية جريمة مأساوية هزّت مشاعر الجالية المصرية، بعدما لقي عامل مصري مصرعه على يد صديقه وزميله في العمل، الذي طـعـنه غدرا بهدف الاستيلاء على أجرته.

"كان رايح يدور على أكل عيشه"

قال جار المجني عليه، محمد ناصر، في تصريحات لـ"تليجراف مصر": "الحاج طارق أمين رواش من الناس المحترمة في البلد وطول عمره طيب جدًا، كان شغال جزار، ولسة مجوز ابنه من 4 شهور، وسافر تركيا عشان يشتغل هناك".

“اللي غدر بيه كان شغال معاه”

وتابع: "كان واخد عمالة معاه يشغلهم، ومن ضمنهم المتهم، يعني هو اللي سفره وشغله، لكن للأسف غدر بيه، واللي عرفناه إنه طارق كان نايم، والمتهم دخل عليه خلّص عليه وخد فلوسه وهرب، الكلام دا كان يوم التلات اللي فات".

"180 ألف ليرة ثمن الخيانة"

وأكمل: "المجني عليه كان محتفظا بمبلغ حوالي 180 ألف ليرة تركية، قيمة شغل 6 شهور، والفلوس دي هي السبب اللي خلّت القـاتل يستدرجه ويسدد له الطـعـنات، جريمة حولت عرق السنين ولقمة العيش لسبب في إنهاء حياة إنسان من أنضف الناس في بلده".

"الجثمان في الطريق"

وتابع: "السلطات التركية قبضت على المتهم امبارح، والجثمان متوقع يوصل النهاردا أو بكرة بالليل، عشان يودع الحاج طارق بلده وأهله اللي مستنيينه بقلوب محروقة".

"البلد كلها حزينة عليه"

واختتم: "إخواته 6 رجالة بمعنى الكلمة ومعروفين بين الناس، والكل يشهد لهم بالخير والعمل الصالح، حرفيًا من أحسن الناس، وعم طارق الله يرحمه كانت كل البلد بتحبه، ولو المتهم كان يعرف قيمته عمره ما كان فكر يعمل معاه كدا، دلوقتي فيه حالة حزن كبيرة سيطرت على القرية بعد الخبر المفاجئ اللي صدم الجميع".