في واقعة "كمين المدرسة".. إخلاء سبيل المتهمة بالتعدي على "طالبة الهرم"

قررت جهات التحقيق، إخلاء سبيل السيدة المتهمة بالتعدي على طالبة تدعى سما أمام مدرسة بمنطقة الهرم بكفالة مالية 20 ألف جنيه، كما تم إخلاء سبيل ابنتها الكبرى المتهمة الثانية في الواقعة.

كشفت والدة سما، المعروفة إعلاميًا بـ"طالبة الهرم" تلقيها تهديدات بعد قرار إخلاء سبيل المتهمين في واقعة الاعتداء على ابنتها.

وأصدرت جهات التحقيق، أمس، قرارًا بإخلاء سبيل التلاميذ المتهمين بالتعدي على طالبة الهرم سما، وإعادة التحريات بالنسبة للأم وابنتها الكبرى.

تهديدات بخطف سما

وقالت أم فارس، والدة سما “طالبة الهرم”، لـ"تليجراف مصر": “قالوا لي لو ما تنازلتيش عن المحضر هنخبط بنتك بتوك توك وهي ماشية أو هنخطفها ومش هتشوفيها تاني وورينا هتنزليها إزاي المدرسة”.

وتابعت: “وقالولي كمان هنخليكي إنتي تبوسي إيدينا بدل ما إحنا بنبوس إيدك عشان تتنازلي”، مضيفة: "أنا خايفة ومش عايزة أضيع حق بنتي برضه، ورايحة أعمل محضر وهثبت فيه التهديدات دي".

القبض على المتهمين

وفي وقت سابق، ألقت أجهزة الأمن بوزارة الداخلية القبض على المتهمين بنصب كمين لتلميذة والتعدي عليها أمام مدرسة بمنطقة الهرم، بعد نشر "تليجراف مصر" للواقعة .

ووقعت طالبة بالمرحلة الإعدادية تدعى "سما" ضحية اعتداء وحشي من قبل أسرة إحدى زميلاتها، على خلفية خلاف بسيط وقع بينهما في المدرسة.

والدة طالبة الهرم تروي التفاصيل

وقالت والدة الطالبة: "يوم التلات حصلت مشادة بين بنتي سما وزميلة ليها، البنت وقفت وسط صحابها وقالت على بنتي ساقطة، وهي مش كدا أصلًا، وده تسبب في شجار صغير، لكن بنتين من تالتة إعدادي تدخلوا وفضّوا الخناقة، والموضوع خلص وماخدش أي حجم".

وأضافت الأم في بث مباشر لـ"تليجراف مصر": "تاني يوم، رُحت أدي لبنتي المفاتيح عشان كانت ناسياها وأنا رايحة شغلي، وهي مدرستها مسائي، الساعة 4 ونص لقيت تليفونها بيرن، أنا متعودة تقولي (أنا مروحة)، لكن المرة دي قالتلي: الحقيني، وبعدها التليفون اتسحب منها، وواحدة ست كلمتني وقالتلي إن بنتي ضربت بناتها الخمسة وليها حق عندي".

سمعت صراخ بنتي في التليفون

وتابعت: "سمعت صوت بنتي وهي بتصرخ وبتتشتم، وعرفت إنهم مسكوا فيها، لكن ما تخيلتش الموضوع يكبر كده، قولتلها تديها التليفون ونقابل مديرة المدرسة، ولو ليها حق أنا هجيبهولها، لكنها قالت لبناتها سيبوها وقفلت السكة، اتحركت من شغلي في حدائق الأهرام، وبعدها صحاب سما كلموني قالولي: الحقي سما سايحة في دمها ومغمى عليها".

وأضافت: "بنتي مالهاش ذنب، إيه اللي عملته عشان يحصل فيها كده؟! دي بلطجة، الخمسة نزلوا عليها من غير رحمة، بنتي من يومها مش بتتكلم ولا بتاكل، وحالتها النفسية منهارة، وبتقول مش هروح المدرسة تاني".