“الجاني ملاك بريء”.. تفاصيل صادمة بحادث وفاة ضحية الزاوية الحمراء (خاص)

كشفت أسرة الشاب الضحية “محمد” - الذي لقي مصرعه في منطقة الزاوية الحمراء بالقاهرة - لـ“تليجراف مصر”، تفاصيل اللحظات الأخيرة في حياة نجلهم، مشيرين إلى أن القاتل كان برفقتهم في المستشفى وساعدهم في محاولة إسعافه، دون أن يعرفوا أنه الجاني.

تصريحات الأسرة

وقالت إحدى قريبات الضحية: "محمد كان عندي في المحل، وقال إنه طالع ياخد دش علشان رايح مشوار، وبعدها رجع شوية وقال إنه نازل يحلق، وتاني يوم ابني اتصل بي وقال لي الحقينا محمد ابن خالي متعور ومرمي في الشارع، جريت عليه ووديناه المستشفى، ومكنتش أعرف مين اللي عمل فيه كده، اللي اكتشفناه إن الشخص اللي كان معانا في المستشفى وبيساعدنا هو اللي قتله".

وأضافت: "المتهم قال لنا إنه أنقذه وجابه المستشفى، فشكرناه على إنه عمل خير، لكن لما محمد فاق شوية، بص له وقال لي هو ده اللي قتلني وبعدها توفى".

 خلص عليه وشاله على التروسيكل

وتابعت: "القاتل خلص عليه وشاله على التروسيكل وجابه قدام المحل غرقان في دمه، لما سألناه قال شافه متعور وحب ينقذه، في الآخر عرفنا إنه قتله بسبب خلاف بينهم، وكان شاكك إن محمد سرق تليفونه، فقابله وضربه بخاتم في وشه، وبعدها طلع سلاح أبيض وطير دراعه كله".

وطالبت بالقصاص قائلة: "إحنا عايزين حق محمد من المجرم ده، وعايزين العدالة تاخد مجراها".

يُذكر أن قوات الأمن ألقت القبض على المتهم، وتباشر النيابة التحقيق في الواقعة تمهيدًا لاتخاذ الإجراءات القانونية اللازمة.