والد أحد ضحايا حادث بيفرلي هيلز : "والد المتهم تعمد قتلنا" (خاص)

المتهم في واقعة التعدي على أسرة مشاجرة ببيفرلي هيلز

A . .A

كشفت التحقيقات مع والد أحد ضحايا حادث بيفرلي هيلز في منطقة الشيخ زايد، ويدعى أحمد محمد عبد الخالق، تفاصيل جديدة تتعلق بالواقعة.

وأكد والد الضحية أن والد المتهم، الملاكم، تعمّد قـتلهم، موضحًا أن المتهم قاد سيارته وصدمه هو وابنه حازم وابن أخته سعيد عمدًا، بعدما لاحقهم بالسيارة واندفع نحو الرصيف ليصطدم بهم بشكل متعمد.

وتواصل "تليجراف مصر" نشر نص التحقيقات مع والد الضحية حازم في القضية التي تأجلت أولى جلساتها إلى 29 نوفمبر الجاري للنطق بالحكم.

س: ما معلوماتك حول الواقعة محل التحقيق وتفصيلات حدوث أصابتك؟

ج: اللي حصل إن ابنى حازم وسعيد ابن أختي كانوا عندي في الفيلا وكانوا بيقولوا إنهم هيرحوا نادى “بيفرلي هيلز” عشان هيقابلوا ناس زمايل حازم في المدرسة فأنا قلتلهم هوصلكم عند النادي واستناكوا عشان أرجعكوا تاني وفعًلا ركبت عربيتي وهما ركبوا معايا ووصلتهم عند نادي بيفرلي هيلز ونزلوا من العربية وأنا وقفت الناحية الثانية بعيد شوية عن النادي وهما راحوا يقابلوا زمليلهم.

فوجئت إنهم قابلوا واحد شكلة أكبر منهم في السن وأنا كنت شايفهم وهما بيتكلموا لقيت الشاب اللي واقف معاهم دا بيضرب سعيد باللكميات في وشة وزق حازم ابني وسعيد وقع على الأرض وحازم نده عليا عشان يستغيث بيا فأنا روحت نازل من العربية وجريت عليهم عشان ألحقهم وأشوف إيه اللي بيحصل لقيت مرة واحدة الشاب اللى كان واقف معاهم جري.

وأبوه كان جاي بعربية أنا وسعيد وحازم حاولنا نبعد لكن زى ما يكون قاصد يخبطنا إحنا الثلاثة بس إحنا جرينا ناحية الرصيف وهو دخل فينا برضو وساعتها وقعت على الأرض بعد الخبطة وهو كان قاصد يقتـلنا كلنا ومحستش بنفسي غير وأنا هنا في المستشفى، وفوقت بعد كام يوم هو ده كل اللي حصل.

س: ما صلتك بكل من حازم، وسعيد المجنى عليهما تحديدًا؟

ج: حازم ده ابني وسعيد ابن أختي.

س: هل من ثمة حوار دار فيها بينك وبين المجنى عليهما سالفي الذكر قبل حدوث الواقعة ؟

ج: أيوو.

س: وما طبيعة ومضمون ذلك الحوار ؟

ج: هو كان الكلام عادي إنهم رايحين يقابلوا ناس زمايل حازم في المدرسة، فأنا عرضت عليهم إني أوصلهم وهما وفقوا عشان أبقى مطمن عليهم وأرجعهم تاني.

س: حدد لنا وقت وصولكم إلى المكان آنف البيان؟

ج: أنا وصلتهم وهما نزلوا على طول قابلوه كان يوم الأربعاء 15 أكتوبر 2025 حوالي الساعة 9:15 مساءًا تقريبًا.

س: ما مدى تطور الحديث فيما بين ذلك الشخص وبين المجنى عليهما سالفي الذكر؟

ج: لقيت مرة واحدة صوت الشاب دا بدأ يعلى وراح زق حازم ابني ومسك سعيد وضربة لكميات كتير في وشة لحد لما سعيد وقع على الأرض وحازم استغاث بيا وأنا نزلت من العربية وجريت عليهم عشان ألحقهم.

س: وما المسافة التي كانت تفصل فيما بينك وبين المجنى عليهما وذلك الشخص الواقف برفقتهم أنذاك تحديدًا؟

ج: هي كانت مسافة قريبة وأنا كنت شايفهم كويس عشان أكون مطمن على ابنى وابن أختي.

س: وما بيانات ذلك الشخص الذي تقابل مع المجنى عليهما أنذاك؟

ج: معرفش اسمه.

س: وما أوصافه إذًا؟
ج: هو شاب طويل وضخم البنية ومعضل وشكلة بيلعب حديد.

س: وما طبيعة ذلك التعدى تحديدًا ؟

ج: هو زق حازم ابني بإيده في صدره وضرب سعيد باللكميات في وشه لحد ما وقع على الأرض وقام بعديها.

س: وكم عدد الضربات التي كالها ذلك الشخص إلى المجني عليهما حال التعدي؟

ج: مش فاكر عددها عشان كان بيضربه بسرعة وره بعض.

س: وأين استقرت تلك الضربات في جسد المجنى عليهما تحديدًا؟

ج: هو زق حازم في صدره والضرب كان في وش سعيد

س: هل نتج من جراء ذلك التعدي ثمة إصابات بالمجني عليهما؟

ج: أيوة سعيد بس حصله إصابات في وشه من الضرب.

س: هل صدر من المجني عليهما ثمة مقاومة أو استغاثة؟

ج: هما ما قاوموش خالص بس ابني حازم استغاث بيا ونده عليا عشان ألحقهم.

س: ما الفترة الزمانية التي استغرقها الشخص سالف الذكر في التعدي على المجني عليهما؟

ج: مش فاكر بس هو كل الضرب دا حصل بسرعة جدًا.

س: ولما لم تقم برد ذلك الاعتداء الواقع على المجنى عليهما آنذاك؟

ج: هو الضرب كان بسرعة جدًا و أول لما حازم استغات بيا نزلت على طول.

س: هل كان بحوزة ذلك الشخص ثمة أسلحة أو أدوات حال تعديه على المجنى عليهما؟

ج: لا هو كان بيضرب بأيده بس وانا مشفتش معه أي أسلحة أو أدوات.

س: ما الذي حدث عقب وصولك لنجدة المجنى عليها؟

ج: هو أول لما نزلت من العربية جريت عليهم راح الشخص اللي كان واقف معاهم ده طلع يجري فجريت وراءه أنا وحازم وسعيد عشان نشوف هو رايح فين وعمل كده ليه لقيت مرة واحدة عربية سودة جايه بسرعة ناحيتنا زى ما يكون كانت مستنيه عشان تخبطنا وفعلًا إحنا شوفناها فجرينا ناحية الرصيف بس هي جات ناحيتنا وخبطت فينا وخبطت في عربية كانت واقفة وبعديها أنا وقعت على الأرض أغمى عليا وما فوقتش غير في المستشفى بعد كده.

س: هل وقفت على شخص ذلك المتعدي عقب أفاقتك بالمستشفى تحديدًا ؟

ج: أيوة أنا لما فوقت سألت حازم وسعيد وعرفت منهم الشاب اللي ضرب سعيد وزق حازم اسمه محمد مصطفى عصام وعرفت كمان إن اللى خبطنا بالعربية السودا أبوه واسمه مصطفى عصام الدين.

س: أين كان متواجد المتهم مصطفى سالف الذكر تحديدًا قبل واقعة الاصطدام بكم تحديدًا؟

ج: انا عرفت إنه كان واقف بعيد وكان مستنى الوقت المناسب عشان يخبط فينا بالعربية بتاعته ويمـوتنا.

س: ولم أراد ذلك المتهم ارتكاب الواقعة محل التحقيق والاصطدام بكم بالسيارة آنفة البيان؟

ج: معرفش ومعرفش إيه المشكلة اللي بين ابنه وبين ابني وسعيد.

س: ما صلتك بالمتهم مصطفى عصام الدين؟

ج: معرفوش

س: هل من ثمة خلافات سابقة فيما بينك وبين أي من المتهمين سالفي الذكر ؟

ج: لا خالص

س: هل حاول المتهم مصطفى عصام الدين استخدام المكابح قبل الاصطدام بكم؟

ج: لا هو كان مزود السرعة حتى خبط في عربية كانت راكنه على جنب الرصيف.

س: هل حاول المتهم إسعافك أو تقديم المساعده عقب أصطدامه بكم؟

ج: لا أنا لما فوقت عرفت أنه مشي وسابنا عشان نمـوت.