طفلة تسأل عن الحجاب غير الشرعي.. وعلي جمعة: مش فاهم!

وجهت طفلة سؤالا للدكتور علي جمعة، مفتي الديار المصرية الأسبق، خلال برنامج “نور الدين”، المذاع على قناة “أون” قائلة: "إيه هي شروط اللي ألبس بها الحجاب وآخد الأجر الكامل، بس في نفس الوقت غير الحجاب الشرعي؟.

ورد جمعة عليها "أنا مش فاهم إيه الحجاب غير الشرعى، لكن الحجاب لازم يكون لا يصف لا يشف لا يكشف، تعملهم بقى زي ما هي عاوزه بأي نوع لبس".

شرعية البنطلونات المقطعة

وخلال الحلقة ذاتها وجهت طفلة سؤالا للدكتور علي جمعة، قائلة: "في بنات بتلبس بنطلونات واسعة هل دى تنفع؟".

ورد جمعة عليها قائلا: “لما سألوني زمان وأنا في الجامعة، عن البنطلونات المقطعة واللي مش مقطعة، قولت لهم أنا مش ترزي عشان أقول إيه ينفع وإيه مينفعش، أنا بقول الأهم إنه لا يصف، لا يكشف، لا يشف”.

وفي حلقة سابقة أجاب فضيلة الدكتور علي جمعة، على سؤال طفلة: "ليه مش بنشوف ربنا؟”.

وقال جمعة: “ربنا خارج الدائرة، هل إحنا نقدر نشوف أمواج الرادار، أو تيار الأشعة اللي بنعمل بها حاجات في جسمنا، الإنسان بيشوف بعين والضوء بينعكس على الحاجة، طيب فين الضوء اللي هينعكس على ربنا”.

“هنشوف ربنا يوم القيامة”

وأضاف جمعة، خلال حلقة برنامج "نور الدين"، المذاع على قنوات الشركة المتحدة، أمس الخميس: "الضوء مينفعش يتسلط على أي حاجة، وربنا ليس مخلوق ومش ممكن يكون مخلوق، ربنا خارج الدائرة الكونية التي فيها، كل المخلوقات، ويوم القيامة هنكون على طرف الدائرة وساعتها هنشوف ربنا بس إزاى منعرفش يبقى كل اللي علينا نعمل عمل صالح علشان نشوف ربنا".

برنامج نور الدين

يُذكر أن برنامج نور الدين، يُعرض على قنوات الشركة المتحدة، ويفتح حوارا مع الأطفال والكبار حول تساؤلاتهم عن الدين والله عز وجل، إضافة إلى المشكلات الحياتية التي تواجه عباد الله وكيفية التغلب عليها، ويرد على أسئلة للمرة الأولى على لسان أطفال صغار.

يجيب البرنامج على أسئلة “فين ربنا، مش بنشوفه ليه"، وغيرها من الأمور التي يقف الآباء أمامها في حيرة شديدة دون إجابة ما جعل البرنامج محل ترقب سواء للأهالي الذين ينتظرونه لفهم الإجابة الصحيحة، أو الأبناء الذين سيجدون في البرنامج فهمًا لما يحاولوا معرفته ويثبتهم بصورة صحيحة ما يبني عندهم وعيًا ويقينًا”.