الست علية والست فوزية

النهاردة  هقولكم حكاية اتنين ستات من مصر.. فى الظاهر بينهم فروق كتيرة.. وفى الباطن مرتبطين ببعض بشكل كبير.. الأولى الدكتورة علية حسن حسين أستاذ الانثروبولجيا بكلية الآداب جامعة بني سويف.. والتانية فوزية خلف الله الشهيرة بأم فؤاد.. ربة منزل بسيطة عايشة في الواحات.

طيب إيه اللي لم الشامي ع المغربي زي ما بنقول في المثل الشعبي؟

الدكتورة علية وهبت حياتها للتراث والبحث في الواحات.. وقدرت تعمل شغل في المنطقة دي ماقدرش يعمله أساتذة ودكاترة كبار في علم الانثروبولجيا.. فضل حلمها يبقى فيه متحف يوثق تراث الواحات المصرية واللي جمعته على مدار 40 سنة شغل.. وقدرت فعلا سنة 2002 تعمل المتحف ده في بيت بالواحات عمره 300 سنة.. بالصدفة أم فؤاد ساكنة قدام المتحف.. كانت واقفة بتطبخ لجوزها وأولادها حست بحركة مش طبيعية في البيت اللي قدامها.. عمال شغالين بيشيلوا وبيحطوا وواقفة معاهم الدكتورة علية بتشرف على كل حاجة بنفسها.. من أول لحظة حست أن ليها دور لازم تعمله.. راحت وساعدت في تنظيم المتحف.. سنة كاملة كل يوم الصبح تروح تقف مع العمال وتساعد في تجهيز وترتيب المتحف.. وبقت قريبة من الدكتورة علية اللي قررت أن أم فؤاد تبقى هى المشرفة على المتحف.

طيب المتحف ده فيه إيه؟

تراث الخمس واحات المصرية.. الداخلة والخارجة والبحرية والفرافرة وسيوة.. صور وسيرة أبرز الشخصيات في الواحات زى الحاج أحمد زايد أول حارس آثار في واحة الخارجة ورجال الشرطة والقانون زمان اللي كانوا بيحموا الواحات وصورة كبيرة للدكتور أحمد فخري أول عالم آثار مصري كتب عن تاريخ الواحات واهتم بآثارهم.. وبالمناسبة ده أستاذ الدكتورة علية اللي كملت طريقه وأسست المتحف.. وكمان الزي الخاص بالرجال والنساء والأدوات اللي كانت بتستخدم داخل البيوت وملابس الزفاف.. وطقوس الأفراح والمناسبات.

السؤال بقا إزاى المتحف ده غير حياة "أم فؤاد"؟

الست فوزية كل يوم الصبح تخرج من بيتها تروح ع المتحف وتستقبل الزوار وقدرت في فترة قصيرة تجيد اللغة الإنجليزية وبقت هى اللى بتشرح لكل السياح تاريخ المتحف وكل حتة من المقتنيات تاريخها إيه وحكايتها ودلالتها عند أهالى الواحات.. وقدرت كمان تطور من المتحف نفسه.. وأخدت مشغولات يدوية من أهالى الواحات وبقت تعرضها بأسعار رمزية وتبيع للسياح وتدى الستات الفلوس يعملوا حاجات تراثية تانية.

"أم فؤاد" مع كل وفد سياحى بيزور المتحف بتكلمهم عن الدكتورة علية وإزاى فوجئت بيها يوم الافتتاح بتقول كلمة طويلة عنها وعن دورها فى إقامة المتحف.. والمفاجأة الكبيرة لما أعلنت أنها اختارتها تبقى المشرفة على كل المقتنيات المهمة اللي جمعتها على مدار 40 سنة شغل فى الواحات الخمسة.. وسلمتها المفاتيح فى حضور المحافظ ورجال وزارة الثقافة وسياح كتير حضروا الحدث المهم.

"أم فؤاد" بتقول كمان أن الاختيار ده زي ما أسعدها حطها في تحدى كبير.. أول حاجة لازم تعرف تاريخ الواحات الخمسة.. وساعدتها الدكتورة علية تعرف وتتعلم وتدرس تاريخ كل واحة.. وتاني تحدي اللغة لازم تعرف إنجليزى علشان تتعامل مع الزوار الأجانب.. وكسبت "أم فؤاد" التحدى وأثبتت أن الست المصرية لما بتدخل فى اختبار بتثبت أنها تقدر تعمل المستحيل.

الخلاصة في كلمتين.. تجربة الدكتورة علية حسن حسين أستاذة الانثروبولجيا.. والست فوزية خلف الله فى حفظ الهوية المصرية في الواحات.. بتقول لنا أنك تقدر تغير حياتك وتكتسب مهارات جديدة كل يوم.. مهارات أنت نفسك مش هتصدق أنك ممكن تتعلمها..