محمد فودة يكتب: فرحنا وهللنا وقضينا ليلة جميلة.. ياللا نتكلم في المفيد

منتخبنا أدى مباراة رائعة بكل المقاييس، بداية من هذا الرجل الرائع الذي يقف على الخط أسطورة مصر حسام حسن مروراً بالجميع مع تفاوت فيما قدمه كل منهم، لكن لدي بعض الرسائل التي أتمنى أن يقرأها ذوو الصلة بتقبل وعقل منفتح..

• يكفينا في البطولات السابقة دور صاحب "التمثيل المشرف" والرجوع بخفي حنين بهزائم وتعادلات، لذا أتمنى أن نكون فعلاً منزعجين من خسارة مباراة كنا أقرب للفوز بها، لولا غياب التركيز في لحظات منها ورعونة الرفيق عمر مرموش!
• إلى اتحاد الكرة، متفائل بما تقومون به حتى الآن، ويبدو أن النية صافية هذه المرة، في ظل غياب المنتفعين والموبوءين الذين حولوا المعسكرات السابقة إلى مولد السيدة واستضافوا كل من هب ودب واستغلوا اللاعبين في البرامج والتصاوير مع الأهل والحبايب، فاستمروا بارك الله فيكم لأن طموحاتنا أصبحت كبيرة
•  حسام حسن: زادك الله حظاً وتوفيقاً ووعياً وتواضعاً، بالله عليك يا أسطورة استمع للمختلف كما تستمع إلى المؤيد، فأمامك مسيرة يمكن أن تسطر اسمك بحروف من ذهب في التاريخ، كلنا بنحبك وبنساندك ونتوسل لك .. ما تخرجش محمد صلاح تاني..
• عمر مرموش: انزل على أرض الواقع يا حبيبي، وقدر المجهود اللي بيعمله زملائك، لو لعبت بالطريقة دي في مانشستر سيتي مش هتشمها، انت أصلاً كنت بتشمها بدعواتنا.. أقسم بالله أنا بحبك واتمنى لك الخير.. لكن رعونة وأنانية وتعالى وتفريط في الكرة في وقت زملائك بيعرقوا دم.. ما يصحش يا حبيبي اتعلم من الإيجبشن كنج.
• إمام عاشور.. انت يا بني ربنا اداك كل حاجة في الكرة، موهبة ربانية مفيش دخل لبني آدم فيها تقريباً، لو ربنا يرزقك بشوية ثقافة واتزان نفسي كمان كان زمانك دلوقتي بتلعب جنب بيدري ودي يونج في برشلونة.. انسى الماتش اللي فات إحنا لسه ما صعدناش وأملنك فيك كبير.
• مصطفى شوبير: ربنا يحرسك ويحميك ويبارك فيك.. سيبك من الموهبة.. أنا أصلاً باحبك علشان متزن نفسياً وذكي ومثقف وشخصيتك قوية، ومتربي.. وده كله كفيل إنه يخليك في حتة تانية.. بالمناسبة دي نفس صفات أيوب بو عدي النجم الصاعد صاحب ال 18 عاماً في منتخب المغرب.. مثقف ومتعلم ومبدع في علم الرياضيات.. الذكاء والثقافة مع الموهبة كوكتيل عظمة.
• محمد هاني: بص يا نجم أنا أصلاً من أبرز محبيك ومؤيديك يا بني، من وانت لسه ناشئ عندك 25 سنة ... باهزر معاك .. من أول يوم لعبت فيه للفريق الأول في الأهلي وانا باقول عندنا باك يمين عالمي بس مهدور حقه من ناس عندها حاجة في النفس أو حاجتين في العين!
• محمد صلاح: لو بربع رجل يا ملك، انت أبرك وأهم من أي لاعب تاني، الكورة في الراس مش في الرجلين، ده الوقت اللي تقدم فيه لمنتخب مصر اللي عمرك ما قدمته قبل كده
• مروان ومهند وفتوح وزيكو وياسر وحمدي وربيعة وزيزو وكل نجوم المنتخب: الكورة مش هتاف وحماس ووطنية وقلب بس .. الكورة الحقيقية اللي قدمتوه واللي لسه هتقدموه في بطولة أتمناها تكون تاريخية وتليق بعلم أعظم بلد في العالم.
• الأستاذ علي محمد علي، بكل أسف كنت باشوف الماتش امبارح في أكثر مكان يشهد تجمع للمصريين في دبي، وللأسف معظم الناس كانوا بيطلبوا تحويل الماتش للقناة اللي بيعلق فيها الجزائري حفيظ دراجي، لأن حضرتك بكل أسف بتحسسنا إنك محايد وأنت بتعلق على منتخب مصر، مع احترامنا لحضرتك .. نتوسل إليك عيش معانا اللحظة!