كريم عبد العزيز عن كواليس مشاركته في "الناظر": اتشالي مشهدين

كشف الفنان كريم محمود عبد العزيز، كواليس مشاركته في فيلم “الناظر” وتفاصيل مقابلته الأولى للمخرج شريف عرفة.

فيلم “الناظر”

وقال كريم، خلال لقائه في برنامج “بيج تايم”: "كنت في المدرسة، ومعايا شيرين شريف عرفة، وكان حلمي أمثل ومش لاقي فرصة، وبنتمشى في البريك، قالتلي بابي بيعمل فيلم عن الناظر وفيه مدرسة، وكان نفسي أشتغل معاه، وقولتلها ممكن أبقى من التلاميذ، قالتلي أنت هتيجي معايا تقابله.

حذف مشاهد

 وتابع: “قابلته اداني الورقة وقالي احفظ، وقرأت المشهد، ودخل يصور، بعد كده جه وقرأت المشهد، وأبويا مكنش يعرف، وروحت بحلم إني همثل مع علاء ولي الدين وشريف عرفة، وكان في عز النجاح لعلاء ولي الدين، وروحت بدري اتفرج على التصوير، كانت متعة غير عادية، وفي العرض الخاص اتصدمت اتشالي مشهدين، وكنت جايب أبويا، والحمد لله إن الفيلم اتشاف”.

وفاة محمود عبد العزيز

وعن نقطة التحول في حياته، قال كريم إنها لحظة وفاة والده، والتي أثرت عليه بشكل كبير، وعلى شخصيته.

الزواج والمسئولية

وأضاف “الجواز مسئولية بجد، وعملت ديل مع والدي، إني أصرف على نفسي، وكنت بشتغل وباخد فلوس وبحطها في البيت، وكل شوية والدي يديني فلوس، وبعد كده قالي أنت مش بتشتغل، وإحساس جديد إني بصرف من فلوسي، وفي الجواز قالي أنت دور على البيت، وأنت اللي هتدفع، وفي الأخر عملي هدية محترمة بعد ما سبني مع العمال”.

وواصل “بعد كتب الكتاب، خدت واحدة بنت ناس من أهلها لازم أحسسها بالأمان، ولما جت بنتي الأولى مكنتش مدرك لغاية ما قالت بابا، وابتدت تغير وجهة نظري حتى في الأفلام، وبحاول تكون أعمالي عائلية”.

اختياره لأدواره

وأتم كريم، “اختار الأعمال التي لا تضايق الجمهور، وكان يوجد فيلم كوميدي معروض علي، عن مجموعة من الأشخاص تبحث عن المخدرات، ولكن رفضته من أجل بناتي، ووالدي عمل الكيف، لكن كان يوجه به رسالة بالابتعاد عن المخدرات”.