ياسر جلال يرد على عتاب ميار الببلاوي: "أخاف أتفهم غلط"

رد الفنان ياسر جلال على الفنانة ميار الببلاوي من خلال حلقة برنامج “الراديو بيضحك” التي تقدمة الإعلامية فاطمة مصطفى عبر إذاعة 9090. 

وقال جلال: “طبعًا أنا مكنتش عايز أرد على الموضوع ده احترامًا للأستاذة ميار، وهي أخت عزيزة واشتغلت معاها سنة 1992، ومن هذا التاريخ لغاية وقتنا هذا أنا مشفتش ميار الببلاوي خالص، هي كلمتني في التليفون مشكورة بكل احترام، وقالتلي عايزة تمثل وقت تصوير مسلسل الفتوة، وأن المسلسل ده ينفع لها بالحجاب، وطبعًا مش هينفع لأنها هتعمل دور مين نجلاء بدر ولا مي عمر؟، دي أدوار متسكنة ووالله العظيم أنا راجل ببص في ورقتي، وأي نجم محترم مالوش أنه يتدخل في الكاست ده شغل المخرج، هي ميار علشان غايبة عن الساحة فترة واعتزلت فمتعرفش”.

وتابع جلال: “أنا رأيي استشاري مع المخرج وعلاقتي بـ زميلاتي كلها حلوة، وميار نجمة معتزلة بقالها كتير، وعايزاني أفرض وجودها على الساحة، وأنا لما أرشح زميلة أخاف أتفهم غلط، أنا مصلحتي إيه معاها؟ أنا مبرشحش زميلات سيدات وده اختصاص المخرج”.

الببلاوي تعاتب ياسر

ويذكر أن الفنانة ميار الببلاوي عاتبت الفنان ياسر جلال  أثناء حلقتها ببرنامج “العرافة” التي تقدمة الإعلامية بسمة وهبي عبر شاشة قناة "النهار".

حيث قالت ميار: “أنا بحب ياسر جلال جداً وبادئين مع بعض، وأخوات وأصحاب، وفي وقت من الأوقات كان واحشني التمثيل، ومحتاجة أشتغل، لظروف نفسية وقناتي كانت مقفولة”.

وأضافت ميار: "أنا جيل أحمد السقا وجيل كريم عبدالعزيز، عمري ما رفعت سماعة التليفون وقولتله أنا عايزة اشتغل معاك، فـ أنا أتجرأت مرة وقلت أكلم ياسر، فكلمته وكان بيعمل مسلسل الفتوة، فـ قولتله ياسر أنا عايزة أطلب منك حاجة بس مكسوفة".

واختتم ميار: "وقولتله ياسر أنا عايزة أشتغل معاك في مسلسل الفتوة لأنه في عصر معين وينفع ألبس الحجاب قال لي: والله مقدرش ومليش حكم في المسلسل ومقدرش أختار حد، واليوم ده قلبي وجعني، ومرة تانية كلمته على رقمه الخاص، رد عليّ وقال لي: أنا اللبيس".