بعد تعرضها للتحرش.. "الشابة حسناء" تعلن عن خطوة رسمية

حررت الشابة حسناء أشرف محضرًا في قسم البساتين، بعدما تعرضت للتحرش الجنسي واللفظي خلال استقلالها سيارة "ميكروباص" صباح اليوم، من راكبين اثنين

شابة تتعرض للتحرش الجنسي واللفظي

وكتبت حسناء على صفحتها الشخصية بموقع التواصل فيسبوك، "أنا في الشارع بقالي 4 ساعات بحاول أعمل محضر لأن قسم المعادي بعتني لقسم البساتين علشان المنطقة من وجهة نظرهم محتاجين يحددوا هي تبع أي قسم فيهم، وقسم البساتين منزلني مع خمسة مخبرين نعمل معاينة بقالنا ساعة في الشارع".

أضافت حسناء، "حررت محضرا في قسم البساتين على الرغم من أن المنطقة تابعة لقسم المعادي حسب كلام معاون مباحث قسم البساتين، وشكرا ليهم، الكلام كان قدامي إن في محاولات لضبط الولد".

وكانت الشابة العشرينية حسناء قد تعرضت لاعتداء جنسي ولفظي خلال استقلالها سيارة "ميكروباص" صباح اليوم، موثقة كل ما تعرض تله من شباب وتعد لفظي من أحد الشباب الذي كان يستقل معها المواصلة.

وكتبت حسناء في منشور تداوله رواد مواقع التواصل الاجتماعي على نطاق واسع، "أنا مبركبش مواصلات عامة بسبب خوفي من التعرض للتحرش من رجالة بلدنا ومرتبي كله ضايع على أوبر، النهاردة الدنيا مكانتش زحمة أوي فقولت فيها ايه لما اركب مواصلات ونوفر".

تابعت حسناء، "كالعادة طلع قرار خاطئ تماما، قاعدة في الكرسيين اللي جنب السواق حاطة السماعات، كل شوية أحس بإيد بتتحط على الكرسي بتاعي من ورا ولازقة في ضهري، بصيت لقيته راجل كبير قولتله ممكن بس إيدك بعد إذنك يا حج، بصلي باستغراب ومتحركش، فقدمت أنا نفسي لقدام، كل شوية إيده بتتحرك مرة تانية إما تشد شعري أو تعمل حاجة غريبة أنا مش قادرة أحددها".

استكملت، "لفيت قولتله بعد إذنك بس يا حج إيديك من عالكرسي، قالي هو أنا لمستك انتي فاكراني بعاكسك يعني!، قولتله أنا مقولتش إن حضرتك بتعاكسني ممكن بس إيدك من على الكرسي؟، راح ماسك الكرسي بايديه الاتنين وقعد يخبط فيه وقالي لأ مش هسيبه، هو انتي فاكراني قدك وهعاكسك قولتله هو انت بتعمل إيه شيل إيدك من عالكرسي، ماليش دعوة قدي ولا لا أنا بقولك الكرسي بتاعي".

أردفت، "لقيت ولد جنبه بيقولي انتي بتتكلمي كدا ليه ده راجل قد أبوكي، قولتله خليك في حالك لو سمحت، أنا مغلطتش فيه، لقيت البطل اللي في الفيديو اللي تقريبا مستحملش يشوف واحدة راجل كبير ضايقها وبترد عليه وبدأ يقولي انتي بتتكلمي كدا ليه وشتمني، واستمر في سيل من الشتائم الزبالة اللي من كتر ذهولي وخضتي منها فضلت ساكتة شوية ومجاش في بالي غير إني اطلع الموبايل أصوره".

وتساءلت حسناء، "طيب أنا دلوقتي مركبتش مواصلات من سنين ولما قررت أجرب حظي يحصل كدا؟، هل ده معناه إني هفضل طول عمري مش عارفة أحوش جنيه بسبب فلوسي اللي ضايعة على أوبر؟، هل كل مرة هحاول إني أوفر فيها هتعرض لمواقف كل ذنبي فيها إني دافعت عن حقي؟".