علبة سجائر في شنطة بنت تشعل الجدل حول "التربية الصح"

أثار منشور لشاب يُدعى إسلام محمد، جدلًا واسعًا على مواقع التواصل الاجتماعي، بعدما روى موقفًا جمعه بشقيقته التي رأت أخرى تدخن السجائر وانتفضت ضد تصرفها، ليشير إلى اختلاف التربية بين شقيقته وتلك الفتاة.

منشور مثير للجدل

وكتب إسلام عبر منشوره: "أمي تعبانة، وفي كل مرة بنروح فيها عند الدكتور أختي بتبقي معايا لمساعدة أمي في أمور اللبس وكدا.. المهم منتظرين دخولنا عند الدكتور.. وكان قاعد قدامنا كام بنت".

وأضاف إسلام: “المهم واحدة منهم بتفتح الشنطة، أختي لمحت معاها علبة سجاير، أقسم بالله أختي بكل عفوية بفطرتها شدتني من دراعي شدة جامدة جدًا.. بتقول لي: إسلام البنت دي معاها علبة سجاير لاتكون بتشربها”!

وتابع: "لوهلة أنا ضحكت جدًا من رد فعل أختي، وبعد الوهلة الأولى حمدت ربنا على التربية اللي ربتها أمي وأبويا لينا، خصوصًا لأختي الكبيرة الوحيدة".

وانهالت التعليقات الساخرة والغاضبة من المنشور، واصفين إياه بأنه عنصري يصف أي فتاة تُدخن السجائر بأنها أقل تربية من شقيقته، حيث علّق أحدهم عبر حسابه: "يا أستاذ إسلام ماما مقالتش ليك إن حرام نبص على شنط الناس ونركز ونشوف جواها إيه؟ طب ما قالتش لأختك إنها لو شافت حد بيعمل فعل مش كويس تدعي له بالهداية بس من غير تنظير.. ماما نسيت حاجات كتير على فكرة".

فيما كتب آخر: "وهو الأدب إنها تدب عنيها في شنط الناس وتقتحم خصوصياتهم؟ دا مش أدب إطلاقًا، مين اللي فهمكم معنى الأدب والاحترام؟ دا في حديث شريف بيقول: (من حسن إسلام المرء تركه ما لا يعنيه)، مش تنطوا بعنيكم جوة شنط الناس".

وعلق آخر: "همّا عبارة عن مناخير أصلًا في حياة باقي البشر.. وطبعا هما ضامنين إنهم الأعلى قيمة والأحب عند ربنا، وداخلين الجنة حدف، والباقين دول درجة تانية من المخلوقات ربنا مش راضي عنها.. العالم دي عندها تعالي وكِبر".

الهجوم واسع النطاق لم يتحمله الشاب إسلام، فقرر أن يخرج في مقطع فيديو عبر صفحته الشخصية ليرد على ما واجهه خلال الساعات الأخيرة، وقال: "بحكي عن موقف ليا أنا وأختي عادي.. والعيادة اللي كنا فيها عشان مكشوفة عينك تجيب كل الناس فإحنا مش قاصدين نبص على شنط حد".

وأضاف إسلام: "أختي بتستنكر بعفوية اللي شافته، إن فيه بنات بتشرب سجاير، فحمدت ربنا إننا في بيئة ريفية هي طبعًا بيحصل فيها أخطاء لكن مش هتتقارن بالريف.. هنا في أهلية وأصول فنزلت البوست بكل عفوية لقيت كمية هجوم وناس كتير جدًا داخلة تشتم.. أنا لا زميت ولا اتكلمت عن شخص بعينه.. إحنا مذكرناش مين الشخص وحتى لو شربت قدامي لا يعنيني بشيء".

وتابع: "أنا فرحت برد فعل أختي.. اتفاجئت إن البنات بتدافع عن البنات اللي بتشرب سجاير.. إحنا في زمن القابض على دينه كالقابض على الجمر.. الزمن دا صعب أوي لمّا كنت بشوف واحد بيعاكس واحدة في الشارع كنت بشوف الناس بتعمل فيه أي.. دلوقت هنلاقي البنات بتتشتم ويتم التحرش بيهم قدام شِنبة ومحدش بيتكلم، ما هو مبقاش حد يتكلم في الصح".

وأضاف: "البوست خدشك فانت هاجمتني.. انتِ بتشربي سجاير فالبوست حسسك إن فيه ناس نضيفة.. البنت معروفة بحيائها وشخصيتها الأنثوية.. أنا عملت البوست في زمن غلط لكن الكلام صح.. الرجالة اللي بجد محتاجين يتعمل لهم محمية طبيعية".