مصطفى كامل يكشف تفاصيل جديدة في أزمة محمد فؤاد وطبيب عين شمس

كشف الفنان مصطفي كامل نقيب الموسيقيين، تفاصيل الخلاف بين الفنان محمد فؤاد وطبيب مستشفى عين شمس التخصصي.

وقال خلال مداخلة هاتفية ببرنامج "على مسئوليتي" الذي يقدمه الإعلامي أحمد موس ويذاع على فضائية "صدي البلد"، "أنا شفت كاميرات المراقبة ومحمد أقسم لي بالله العظيم أنه لا شتم، ولا بدأ الأزمة وقال لي: أنا رايح مخضوض على أخويا ودخلت سلمت عادي".

وتابع: "في الفجر محمد فؤاد راح يكلم الدكتور مردش فقال له إنت مبتردش عليا ليه هو أنت لسه صاحي من النوم، فالدكتور اتعصب وقال لهم فين الأمن طلعوا البتاع ده بره، ومن هنا بدأت المشكلة بين المجموعة اللي مع محمد والأمن وطبعا زعلوا من الطريقة بتاعة الدكتور".

وقال كامل: "أنا مش عايز حد يفهمني غلط بس كل واحد في مكانه بيسيطر أنا لو جاء لي نقيب الأطباء في مكان شغلي هل ميستاهلش مني أوقره؟ إحنا نستاهل من بعض التوقير، أنا لفت نظري إمبارح السيد الدكتور أمين عام نقابة الأطباء، وهو بيتكلم وبيقول إن محمد فؤاد مواطن عادي أنا مش هينفع أعقب عليه عشان محدش يفهمني غلط لكن أبسط حقوق المواطنة الاحترام والمعاملة الحسنة".

واستطرد: "احنا كلنا لما بنتحط في الموقف ده، ده لو جارك هتبقي مشدود عليه، بس إحنا الأطباء والموسيقيين والضباط، ممكن أي حد يطلع منه موقف غير لطيف بس في النهاية ده موقف فردي مينفعش يسيء للجميع".

وأضاف: "محمد عشرة عمر ومصيبته طول عمره أنه ابن بلد وأبسط من البساطة وشخص ودود ومن زمان وهو في أوج حالات نجاحه كان يقول لي تعالي ناكل على عربية الفول دي، محمد ليس متعالي ولا بلطجي ومينفعش نسمح للناس تنفخ في النار وتبوظ العلاقة بين مؤسسات وبعضها".