"الممثلين" ترد على استغاثة نبيلة عبيد من الإيجار القديم: "ملناش دعوة"

رد الفنان منير مكرم، عضو مجلس إدارة نقابة المهن التمثيلية، على استغاثة الفنانة نبيلة عبيد بالنقابة بعد إقرار قانون الإيجار القديم، والذي يقضي بإنهاء العلاقة الإيجارية بعد 7 سنوات، وهو ما يهدد بإخلاء شقتها في جامعة الدول العربية. 

القانون فوق الجميع

وقال منير مكرم لـ “تليجراف مصر”: “النقابة ملهاش علاقة إحنا مواطنين مصريين وده قانون والقانون فوق الجميع ومحدش يقدر يقف قدامه فالنقابة ملهاش أي تدخل”.

وتابع مكرم: “أنا شقتي إيجار قديم بردو والقانون هيمشي عليا زيي زي أي حد، أنا مواطن طيب بفطر فول وطعمية وماشي جنب الحيط وأتمنى إن كل الناس تبقى بخير".

استغاثة نبيلة عبيد

وأبدت الفنانة نبيلة عبيد تخوفها بعد إقرار قانون الإيجار القديم الذي تمت الموافقة عليه من مجلس النواب مساء أول أمس، حيث قالت في تصريحات لـ “تليجراف مصر”: "هياخدوا مني الشقة اللي فيها تاريخي السينمائي كله فيها هدومي وفيها صوري وجرايد ومجلات كل التاريخ بتاعي اللي بقاله أكتر من 40 سنة موجود في الشقة دي”.

وأضافت نبيلة عبيد باكية: “أنا مش عارفة أشيل التاريخ الفني اللي في الشقة ده أوديه فين يعني يستنوا لما أموت وياخدوه إنما بين يوم وليلة؟ أنا أجيب مكان منين، أنا لسة شايفة القانون إمبارح ومش عارفة أتفاهم مع مين؟”.

منزل نبيلة عبيد

وتابعت عبيد: “البيت ده من أيام بداياتي انا بفتح المفتاح وأخش اشم ريحته وريحة أمي اللي كانت عايشة معايا فيه.. أنا لا اتجوزت ولا خلفت أنا عيشت مع أمي فيها وكل فني وكل اللي عملته في الشقة موجود.. وأصحاب الملك ما هيصدقوا ياخدوها دي شقة إيجار في جامعة الدول العربية”.

واختتمت نبيلة عبيد حديثها: “أنا في حيرة مش عارفة أخد الحاجات دي كلها من يوم وليلة أوديها فين.. القانون ده مالهوش غير أذية ليا أنا.. وبردو ناس كتير هتتأذي وأنا بالأخص لإن عندي تاريخ كبير فيها، وأنا هتكلم مع النقيب أشرف زكي بليل”.