نبيلة عبيد باكية: "هياخدوا شقتي ومش عارفة أودي حاجتي فين"

أبدت الفنانة الكبيرة نبيلة عبيد تخوفها بعد إقرار قانون الإيجار القديم الذي تمت الموافقة عليه من مجلس النواب مساء أول أمس، مشيرة إلى أنها أصبحت مهددة بالطرد من شقتها في جامعة الدول العربية بالعجوزة، والتي كانت شاهدة على تاريخها الفني على مدار أكثر من 40 عامًا.

استغاثة نبيلة عبيد

وقالت نبيلة عبيد، لـ “تليجراف مصر”: “هياخدوا مني الشقة اللي فيها تاريخي السينمائي كله فيها هدومي وفيها صوري وجرايد ومجلات كل التاريخ بتاعي اللي بقاله أكتر من 40 سنة موجود في الشقة دي”.

وأضافت نبيلة عبيد باكية: “أنا مش عارفة أشيل التاريخ الفني اللي في الشقة ده أوديه فين يعني يستنوا لما أموت وياخدوه إنما بين يوم وليلة؟ أنا أجيب مكان منين، أنا لسة شايفة القانون إمبارح ومش عارفة أتفاهم مع مين؟”.

منزل نبيلة عبيد

وتابعت عبيد: “البيت ده من أيام بداياتي انا بفتح المفتاح وأخش اشم ريحته وريحة أمي اللي كانت عايشة معايا فيه.. أنا لا اتجوزت ولا خلفت أنا عيشت مع أمي فيها وكل فني وكل اللي عملته في الشقة موجود.. وأصحاب الملك ما هيصدقوا ياخدوها دي شقة إيجار في جامعة الدول العربية”.

واختتمت نبيلة عبيد حديثها: “أنا في حيرة مش عارفة أخد الحاجات دي كلها من يوم وليلة أوديها فين.. القانون ده مالهوش غير أذية ليا أنا.. وبردو ناس كتير هتتأذي وأنا بالأخص لإن عندي تاريخ كبير فيها، وأنا هتكلم مع النقيب أشرف زكي بليل”.

ومن بين جدران منزل نبيلة عبيد بجامعة الدول، تتواجد صورها في جميع مراحل حياتها الفنية حتى على الوسائد، كما زُينت شقتها بشهادات التقدير والجوائز التي حصلت عليها في جميع أعمالها على مدار مشوارها الفني، كما تواجدت به صور من زفاف صباح الجزائري من زوجها اللبناني.