صاحب السيارة في واقعة الأوتوستراد: شهاب غلط وكان يلزمه تقويم سلوك

قال الدكتور محمد عبد الجواد، الذي تعرّض لتعدٍ على طريق الأوتوستراد من قبل الشاب “شهاب” (سائق توكتوك)، إن هدفه لم يكن الحصول على أي تعويض مادي من قبل أسرة الشاب، بل كان يسعى لتقويم سلوكه وتوجيهه وأمثاله من الشباب.

وأوضح عبد الجواد، خلال مداخلة هاتفية مع الإعلامي تامر أمين في برنامج "آخر النهار"، أنه حاول توجيه شهاب لاحترام الطريق وتفادي الرعونة أثناء القيادة، إلا أنه فوجئ برد فعل غير لائق منه، تطور إلى تعدٍ.

وأشار إلى أن رسالته كانت تربوية في المقام الأول، مؤكدًا أن المجتمع بحاجة إلى تقويم سلوكيات بعض الشباب وليس فقط معاقبتهم.

وفي وقت سابق، ظهر والد الشاب شهاب، صاحب ترند “أنا من أرض الجمعية” الذي أثار جدلًا واسعًا بين رواد التواصل الاجتماعي خلال الأيام الماضية؛ في بث مباشر عبر "تليجراف مصر".

وقال والد شهاب لـ"تليجراف مصر" إن نجله عمره 15 عامًا وكان يدرس في مدرسة محمد نجيب، وترك التعليم ليعمل سائق على توكتوك ويساعد والده في مصاريف المنزل.

وتابع قائلًا: “مش هو ده ابني اللي ظهر في الفيديو، ابني شهاب عمره ما غلط في حد ولا دي تربيته، وعمره ما عمل كده مع حد، واللي خلاه يوصل لكده أكيد صاحب العربية (يقصد محمد عبد الجواد) اللي بدأ بالغلط، أنا مش بقول إنه مش غلطان، لأ هو غلطان طبعًا بس الغلط الأساسي من الراجل التاني”.

وأضاف والد شهاب، “كنت قاعد مع واحد صاحبي الساعة 1 بالليل وقال لي الحق ابنك متصور فيديو ونازل على النت وهو بيغلط في واحد، وفوجئت بعدها بناس صحاب شهاب بيقولوا لي الحق ابنك أخدته الحكومة على القسم، ورحت على القسم بسرعة علشان أشوف اللي حصل، وأنا متأكد أن صاحب العربية هو اللي استفز ابني وخلاه يعمل كده، لأن أنا لو مكان الراجل وحد خبط عربيتي أكيد هيكون ردي وحش، وده اللي عمله صاحب العربية”.

وأكمل والد شهاب، “أنا بوجه رساله لصاحب العربية بقول له حرام عليك أنت مش بس ظلمت عيل، لأ أنت قضيت على مستقبله خالص، هو حقه إنه يزعل على عربيته، ويزعل كمان على الغلط بتاع شهاب، بس أنت كده دمرت ابني خالص، وأحب أقوله أنت مشكور إنك اتنازلت لابني في النيابة، لأني سمعت من الناس إنك اتنازلت”.

وواصل “الناس بتقول إن القضية بقيت رأي عام، وأن شهاب بلطجي، حرام عليكم ليه عاوزين تضيعوا ابني، وبطلب من صاحب العربية ينشر الورق اللي بيثبت إنه اتنازل لابني، ولو عاوز يصلح عربيته أنا أصلحها له بإيدي، أنا أصلا سمكري سيارات”.

واختتم والد شهاب حديثه لـ"تليجراف مصر" بقوله: “هي الناس هتستفاد إيه من حبسته، ده بيساعدني في مصاريف البيت وبيصرف معايا على أخواته، وبعدين هو لو اتحبس هيطلع إيه من جوه، وذنبه إيه عيل زي ده يتدمر ويتحبس بالشكل ده، وبطلب من الناس كلها تقف جنبي، ويعرفوا حقيقة شهاب”.