محامي صاحب واقعة الأوتوستراد: أسرة "شهاب" تحاول كسب تعاطف الرأي العام

أكد المحامي هاني محمد، دفاع الدكتور محمد عبد الجواد المعتدى عليه في واقعة شهاب سائق التوكتوك (صاحب ترند “أرض الجمعية”)، أن التصريحات المتداولة من أسرة الأخير تهدف فقط إلى كسب تعاطف الرأي العام.

 لم يكن يسعى لتحقيق أي شهرة

وقال خلال مداخلة هاتفية مع الإعلامي تامر أمين في برنامج "آخر النهار"، إن موكله لم يكن يسعى لتحقيق أي شهرة أو "ترند"، مشيرًا إلى أن نشر فيديو الواقعة جاء بدافع توجيه رسالة لتقويم سلوك الشاب، وليس بدافع التشهير أو التصعيد.

تعامل بمنتهى الرقي والهدوء

وشدد المحامي على أن عبد الجواد تعامل بمنتهى الرقي والهدوء، وكان هدفه الأساسي هو توعية هذا الشاب ومن على شاكلته، بضرورة احترام الآخرين والالتزام بقواعد الطريق.

من جانبه قال والد شهاب لـ"تليجراف مصر" إن نجله عمره 15 عامًا وكان يدرس في مدرسة محمد نجيب، وترك التعليم ليعمل سائق على توكتوك ويساعد والده في مصاريف المنزل.
وتابع قائلًا: “مش هو ده ابني اللي ظهر في الفيديو، ابني شهاب عمره ما غلط في حد ولا دي تربيته، وعمره ما عمل كده مع حد، واللي خلاه يوصل لكده أكيد صاحب العربية (يقصد محمد عبد الجواد) اللي بدأ بالغلط، أنا مش بقول إنه مش غلطان، لأ هو غلطان طبعًا بس الغلط الأساسي من الراجل التاني”.

وأضاف والد شهاب، “كنت قاعد مع واحد صاحبي الساعة 1 بالليل وقال لي الحق ابنك متصور فيديو ونازل على النت وهو بيغلط في واحد، وفوجئت بعدها بناس صحاب شهاب بيقولوا لي الحق ابنك أخدته الحكومة على القسم، ورحت على القسم بسرعة علشان أشوف اللي حصل، وأنا متأكد أن صاحب العربية هو اللي استفز ابني وخلاه يعمل كده، لأن أنا لو مكان الراجل وحد خبط عربيتي أكيد هيكون ردي وحش، وده اللي عمله صاحب العربية”.

وأكمل والد شهاب، “أنا بوجه رساله لصاحب العربية بقول له حرام عليك أنت مش بس ظلمت عيل، لأ أنت قضيت على مستقبله خالص، هو حقه إنه يزعل على عربيته، ويزعل كمان على الغلط بتاع شهاب، بس أنت كده دمرت ابني خالص، وأحب أقوله أنت مشكور إنك اتنازلت لابني في النيابة، لأني سمعت من الناس إنك اتنازلت”.

وواصل “الناس بتقول إن القضية بقيت رأي عام، وأن شهاب بلطجي، حرام عليكم ليه عاوزين تضيعوا ابني، وبطلب من صاحب العربية ينشر الورق اللي بيثبت إنه اتنازل لابني، ولو عاوز يصلح عربيته أنا أصلحها له بإيدي، أنا أصلا سمكري سيارات”.

واختتم والد شهاب حديثه لـ"تليجراف مصر" بقوله: “هي الناس هتستفاد إيه من حبسته، ده بيساعدني في مصاريف البيت وبيصرف معايا على أخواته، وبعدين هو لو اتحبس هيطلع إيه من جوه، وذنبه إيه عيل زي ده يتدمر ويتحبس بالشكل ده، وبطلب من الناس كلها تقف جنبي، ويعرفوا حقيقة شهاب”.