رمضان الذي لا يعرفه جيل z.. اللي بيته ع الطريق ممنوع عليه الإفطار مع مراته

وبعدما نوّحد الديان، ونصلي على خير الأنام، حكاينا النهارده عن الناس اللي بيوتهم على طريق أو شارع، حبايبنا دول ممنوع عليهم يفطروا مع حريمهم طوال الشهر الكريم، واللي يقفل باب بيته من قرآن المغرب لحد قبل أدان العشاء بشوية، يبقى ارتكب عيبة كبيرة. والسبب يا حبايبنا، إن الناس دول – في كل البلاد– كانوا عارفين إن فيهم ناس ممكن يزنق عليه الوقت ومدفع الإفطار يضرب عليه في الطريق، سواء كان من أهل البلد أو غريب عنها.

علشان كده كان صاحب البيت اللي على شارع كبير أو طريق عمومي، يجهز صينية الإفطار، ويفرش قدام بابه، ويفطر بره البيت، ومع صوت الأدان، يفضل يتلفت شمال ويمين، إذا لمح أي نفر ماشي، سواء يعرفه أو ما يعرفهوش، يمين تلاته لازم يكون ضيفه، يقعد يشاركه القسمان وياخد واجبه وبعدين يسمح له يروح لحال سبيله. 

واللي يحل عليه وقت الإفطار في الطريق، يعتبر أسير عند أول بيت قدامه صينية أكل، ما لهوش حق يتحرك حتى لو كان بيت أخوه بعد خطوتين، حق وأصول يجبر بخاطر الزاد وأصحابه، ولو نشف دماغه ومشي يكون حق وتبقى مشكلة وعليه حق يتحاسب بيه. 

وفي يوم راجل كبير- علامة على كده– زنق عليه الوقت، وبيته كان بعيد في الغيط، كان فاكر اللي يفطر صايم ياخد ثواب صيامه، وطبعا خاف على صيامه وتعب اليوم عطش وجوع، صاحبنا – عليه رحمات الله– لف مسافة تزيد على 10 كيلوا متر، مشي في طريق مقطوع، لا فيه حد ساكن ولا قاعد، طريق على جرف ترعة بين الغيطان والزرع، ولما وصل بيته كانت صلاة العشا باقي عليها قليل. 

وفي الوقت ده كان الجيران شركا في الأكل، وخصوصي اللي له ريحة، فمثلا لو أنت حالك ميسور وأهل بيتك كل يوم عاملين طبيخ معتبر أو جايب لبيتك شروة سمك، أو حتى صايدهم، حتما ولا بد إنك تودي لجيرانك طبق طبيخ وحتتين لحم أو زيهم سمك، لأنه لا ينفع ولا يصح إنك تاكل وتملى بطنك والجيران جنبك ما ينوبهم إلا الريحة. 

وقيس على الأكل وريحته إذا كنت جايب فواكه بأنواعها وحد من الجيران شافها، علشان كده كان فيه ناس تجيب الفاكهة في حاجات مقفولة، وناس كانت بتصنع حاجة من زعف النخل لزوم التساويق، كانت شبه شنط البنات الفافي بتوع أيامكم، ودول إما أنهم بخلا، أو حالتهم المالية يا دوب مستورة.

أما إذا كنت فلاح ومزارع وغيطك فيه أي شئ للأكل، من الفجل والجرجير لحد ما توصل للخيار والبطيخ، عيب وغلط عليك، إذا حد طلب منك وأخدت منه فلوس، وإذا حد عدى عليك وأنت بتجني اي زرع، يمين بالتلاتة لازم ياخد منه، وبلوشي من غير أبيض أو أسود، أيوة عيب تاكل والناس تبص عليك من غير ما تدوقه. 

و بكره حكاية جديدة من رمضان زمان..