"وقفت أدوية وعطشت نفسها".. أم تدخل في غيبوبة 16 يومًا وتصاب بالشلل بسبب الطيبات

الدكتور ضياء العوضي صاحب نظام الطيبات

A . .A

حذرت فتاة تدعى إنجي من نظام الطيبات، بعدما دخلت والدتها في غيبوبة وأصيبت بالشلل بعد توقفها عن تناول الأدوية وتجنبت شرب المياه بزعم أنها ضارة، حسبما يدعي النظام الغذائي الخاص بالدكتور الراحل ضياء العوضي.

16 يوم في العناية المركزة

وكتبت إنجي في منشور لها عبر “فيسبوك”: "بمر بأصعب فترات حياتي.. كل حاجة في حياتي متلخبطة، بسبب تعب أمي لكن هتكلم لعل أكون سبب في إنقاذ حد.. أمي بقالها 16 يوم في العناية المركزة، جلطه في الفص الشمال كله من المخ وفي غيبوبة، مفيش وعي ولا إدراك، ومش بتتكلم، وعندها شلل في الجزء اليمين من جسمها، إيد ورجل”.

وأضافت إنجي: “عجز الطب وفي النهاية أصبح كل اللي في إيدينا هو الدعاء.. أمي كانت بتتبع نظام الطيبات، وكانت مؤمنة بكل كلمة بتتقال فيه، النظام ده خلاها توقف أدوية كانت بتاخدها بانتظام من سنين، ومن ضمنها دواء السيولة، وكمان كانت بتقلل شرب المياه وبتمنع نفسها من الشرب رغم العطش”.

التوقف عن الأدوية وشرب الماء

وتابعت: “كنت بحاول معاها كتير وأقول لها إن اللي بيحصل ده خطر، وإن مفيش منطق إن المياه اللي ربنا قال عنها:﴿وَجَعَلْنَا مِنَ الْمَاءِ كُلَّ شَيْءٍ حَيٍّ﴾ تكون مضرة للإنسان بالشكل ده لكن كل محاولاتي فشلت”.

واستكملت حديثها: “إيمانها بالكلام اللي بيتقال كان أقوى من أي محاولة مني لإقناعها.. أنا بكتب الكلام من قلب بنت نفسها وتتمنى ترجع بالزمن، لو في حد بيفكر يتبع نظام الطيبات، وقف فورًا اللهم إني بلغت، اللهم فاشهد، أنا مش عايزة حد يعيش الوجع اللي إحنا عايشينه دلوقتي وأرجوكم ادعوا لأمي”.