فتاة المترو ترفض كشف هويتها: مش بدور على شهرة، وصورت الواقعة عشان أحمي نفسي

كشفت فتاة المترو بطلة واقعة المسن، تفاصيل جديدة عن الحدث، مبدية رغبتها في عدم الإفصاح عن هويتها لأنها لا تريد الشهرة أو تحقيق “الترند”.  

كان هدفي أحمي نفسي 

وقالت الفتاة، في تصريحات لـ"تليجراف مصر": “أنا مش محتاجة شهرة ولا ترندات، وكان هدفي الوحيد إني أحمي نفسي وأوثّق اللي بيحصل، وأنا ست محترمة ومتربية”.

تعرضت لهجوم وانتقادات

وتابعت: “اتفاجئت بهجوم كبير عليا، واتقال عليا مش محترمة ومش متربية، لمجرد إن عندي غضروف في رجلي، ورجلي مش بتتفرد كويس لفترة طويلة، وطول ما أنا قاعدة لازم أكون ساندة رجلي، فحطيت رجل على رجل، ومكانتش في وش حد، وكان فيه مسافة كبيرة بيني وبينهم”.

ضربني بالعصا

وأكملت: “وأنا قاعدة فجأة حسيت إن فيه حد بيخبطني في رجلي بعصاية، اتخضيت واترعبت، فببصله وبقوله في إيه؟ لقيته بيقولي نزلي رجلك واقعدي كويس، فقولتله لا مش هنزلها وإنت مالك”.

هجوم داخل عربة المترو

وأوضحت: “بعدها بدأ يهاجمني ويزعق، والناس اتلمت تتفرج، وأنا حسيت إني مش في أمان، خصوصًا إننا في مترو وأنا راكبة لوحدي، ومحدش عارف الشخص دا ممكن يعمل إيه”.

صورت الواقعة علشان أحمي نفسي 

واستطردت: “طلعت الموبايل وبدأت أصور لسبب واحد بس، إن لو حصل أي تجاوز أكتر من كدا أعرف آخد حقي، لأننا في مواصلة عامة ومش ضامنة أي حاجة”.

ردود فعل الناس على السوشيال ميديا 

وأضافت: “مستغربة جدًا من ردود فعل الناس والهجوم عليا علشان صوتي كان عالي، بس دا طبيعي لأي ست لوحدها تحس بالتهديد، ومحدش يعرف ظروف التاني إيه”.

مش مسامحة أي حد شتمني

واختتمت حديثها قائلة: “أنا مش مسامحة أي حد شتمني أو سبني، ولو كان اتقالي من الأول باحترام نزلي رجلك، ما كانش كل دا حصل، وهو اللي بدأ بالهجوم، وأنا عمري ما أعلي صوتي على راجل كبير ولا كنت أحب إن الموضوع يوصل لكدا”.